BJP’s defeat in Muktainagar due to MLA Khadse! : Minister Girish Mahajan जळगाव (21 डिसेंबर 2025) : मुक्ताईनगरात खरे तर महायुतीसोबत जाण्याचा आम्ही निर्णय घेतला मात्र स्थानिक नेत्यांनी ऐकले नाही त्यातच आमदार एकनाथ खडसेंनी भाजपासाठी मते मागितल्याने मतदारांना ही बाब रुचली नाही व त्यामुळेच भाजपाचा मोठा येथे पराभव झाला, अशी भावना भाजपाचे नेते व मंत्री गिरीश महाजन यांनी व्यक्त केली. मुक्ताईनगरमध्ये केंद्रीय मंत्री रक्षा खडसे यांना होम पिचवर पराभवाचा सामना करावा लागल्याने त्यांच्या नेतृत्वावर टीकेची झोड उठली असतानाच आता मंत्री यांनी भाजपच्या पराभवाचे खापर मंत्री गिरीश महाजन यांनी खडसे कुटुंबावर फोडले आहे.
काय म्हणाले गिरीश महाजन ?
मंत्री गिरीश महाजन यांनी थेट एकनाथ खडसे यांच्यावर निशाणा साधला. ते पुढे म्हणाले की, एकनाथ खडसे आणि रोहिणी खडसे राष्ट्रवादी शरद पवार गटात असताना भाजपच्या व्यासपीठावर येऊन प्रचार करतात, हे कार्यकर्त्यांना आणि मतदारांना पटले नाही. याचा थेट फटका आम्हाला बसला.
खडसे कुटूंबाचे राजकीय वजन संपले
महाजन यांनी खडसे कुटुंबाच्या राजकीय ताकदीवरही प्रश्नचिन्ह उपस्थित केले. एकनाथ खडसे यांचे आता काहीही राजकीय वजन उरलेलं नाही. दोन वेळा त्यांची मुलगी विधानसभेत उभी राहिली, पण दोन्ही वेळा मोठ्या फरकाने पराभूत झाली, असा टोला त्यांनी लगावला. मुक्ताईनगरमध्ये भाजपची जागा गमवावी लागल्याची खंत व्यक्त करत, या पराभवामागे खडसे कुटुंबच जबाबदार असल्याचा आरोप, महाजन यांनी केला.
या आरोपांमुळे जळगाव जिल्ह्यातील राजकारणात पुन्हा एकदा खळबळ उडाली असून, भाजपमधील अंतर्गत नाराजी आणि जुन्या वादांचे पडसाद आगामी काळात अधिक तीव्र होण्याची चिन्हे दिसत आहेत. मुक्ताईनगरचा निकाल हा केवळ नगरपंचायतीपुरता मर्यादित न राहता, जळगाव जिल्ह्यातील राजकीय समीकरणांना नवी दिशा देणारा ठरत असल्याचे चित्र आहे.
