सावदा पोलिसांची मोठी कारवाई : पाच लाख 28 हजारांच्या गुटख्यासह अकलूदचा संशयीत जाळ्यात

सावदा, ता.रावेर (शुक्रवार, 28 ऑगस्ट 2026) : सावदा पोलिसांनी गोपनीय माहितीच्या आधारे एका कारमधून प्रतिबंधीत गुटख्याची वाहतूक होत असताना कारवाई केली. यावल तालुक्यातील अकलूद येथील संशयीताच्या वाहनातून पाच लाख 28 हजार रुपये किंमतीचा गुटखा जप्त करण्यात आला. गुटखा व कारसह एकूण 10 लाख 27 हजार 700 रुपये किंमतीचा मुद्देमाल जप्त करण्यात आला.

गोपनीय माहितीवरून कारवाई
सावदा सहा.निरीक्षक गणेश फड यांना गुटख्याची वाहतूक होणार असल्याची माहिती मिळाल्यानंतर त्यांनी पथकाला निर्देश दिले. 27 रोजी रात्री 10.50 वाजेच्या संशयीता होंडा अमेझ कार (एम.एच.19 सी.व्ही.4445) आल्यानंतर चालक सारंग मुरलीधर अवचार (31, रा. अकलूद, ता.यावल) याच्याकडे चौकशी केली असता त्याने कारमध्ये प्रतिबंधित गुटखा असल्याची कबुली दिली. यावेळी विमल पानमसाला आणि तंबाखूचे वेगवेगळे पाकीट मिळून पाच लाख 28 हजार रुपये किंमतीचा गुटखा जप्त तसेच पाच लाखांची कार मिळून 10 लाख 27 हजार 700 रुपये किंमतीचा मुद्देमाल जप्त करण्यात आला.