स्व.आर.आर.पाटील यांच्या जयंतीनिमित्त थोरगव्हाणमध्ये 21 नोव्हेंबरला भव्य महाआरोग्य शिबिर

थोरगव्हाण (मंगळवार, 10 नोव्हेंबर 20526) : ग्रामीण भागातील नागरिकांना दर्जेदार आरोग्यसेवा उपलब्ध करून देण्याच्या उद्देशाने माजी आमदार तथा दी एज्युकेशन सोसायटीचे माजी अध्यक्ष स्व.आर. आर.पाटील यांच्या जयंतीनिमित्त थोरगव्हाण येथे भव्य महाआरोग्य तपासणी शिबिराचे आयोजन करण्यात आले आहे. शनिवार, 21 नोव्हेंबर 2026 रोजी सकाळी 10 ते दुपारी 2 या वेळेत डी. एस. देशमुख माध्यमिक व उच्च माध्यमिक विद्यालयाच्या परिसरात हे शिबिर पार पडणार आहे.

सामाजिक कार्याच्या स्मृती जपण्याचा प्रयत्न
दी एज्युकेशन सोसायटी संचलित डी. एस. देशमुख विद्यालय, थोरगव्हाण आणि गोदावरी फाउंडेशन, जळगाव यांच्या संयुक्त विद्यमाने आयुष्मान भारत प्रधानमंत्री जनआरोग्य योजनेंतर्गत हा उपक्रम राबविण्यात येत आहे. स्व. आर. आर. पाटील यांच्या सामाजिक कार्याच्या स्मृती जपत आरोग्यसेवेच्या माध्यमातून त्यांना अभिवादन करण्याचा या उपक्रमाचा उद्देश आहे.

गतवर्षी त्यांच्या जयंतीनिमित्त ‘जागर संविधानाचा, संकल्प व्यसनमुक्तीचा’ हा सामाजिक प्रबोधनाचा कार्यक्रम आयोजित करण्यात आला होता. यंदा ग्रामीण भागातील नागरिकांना एकाच ठिकाणी विविध आजारांची तपासणी आणि तज्ज्ञ डॉक्टरांचे मार्गदर्शन मिळावे, यासाठी आरोग्य शिबिराचे आयोजन करण्यात आले आहे.

हृदयरोगापासून अस्थिरोगापर्यंत विविध तपासण्या
शिबिरात हृदयरोग विभागामार्फत ईसीजी, कार्डिओग्राफी, मधुमेह आणि रक्तदाब तपासणीसह हृदयविकारासंदर्भात मार्गदर्शन केले जाणार आहे. अँजिओग्राफी, अँजिओप्लास्टी, पेसमेकर, रिनल अँजिओप्लास्टी, आय.व्ही.सी. फिल्टर आणि बायपास शस्त्रक्रियांसंबंधी माहितीही उपलब्ध करून दिली जाणार आहे.

नाक-कान-घसा विभागात कानाचा पडदा, टॉन्सिल आणि नाकाच्या हाडासंबंधी तपासणी केली जाईल. नेत्ररोग विभागात मोतीबिंदू व तिरळेपणा, तर स्त्रीरोग विभागात गर्भाशयाच्या विविध आजारांची तपासणी आणि मार्गदर्शन करण्यात येईल.

अस्थिरोग विभागात सांधेदुखी, फ्रॅक्चर, कंबरदुखी, संधिवात, हाडांची झीज, हाडे ठिसूळ होणे, अपघातातील दुखापती आणि मणक्याच्या विकारांची तपासणी केली जाणार आहे. त्वचारोग विभागात मुरूम, पुरळ, खाज, खरूज, इसब, गजकर्ण, नायटा आणि केस गळण्यासारख्या समस्यांवर वैद्यकीय सल्ला मिळेल.

शस्त्रक्रिया विभागात मुतखडा, मूत्रपिंडातील खडे, प्रोस्टेट, पित्ताशयातील खडे, थायरॉईड, मूळव्याध, भगंदर, फिशर, हर्निया, अपेंडिक्स आणि हायड्रोसिल यांसारख्या आजारांबाबत तपासणी व उपचारांसाठी मार्गदर्शन करण्यात येईल.

जनरल मेडिसिन विभागात यकृत, पित्ताशय, पोट, किडनी, फुफ्फुसे आणि कावीळ यासंबंधीच्या आजारांची तपासणी होईल. तसेच मानसोपचार विभागात तणाव, नैराश्य, झोपेच्या समस्या, चिंता, भीती आणि व्यसनाधीनतेसारख्या समस्यांवर समुपदेशन व मार्गदर्शन उपलब्ध राहणार आहे.

आयुष्मान भारत योजनेचा लाभ घेण्याचे आवाहन
आयुष्मान भारत प्रधानमंत्री जनआरोग्य योजनेंतर्गत पात्र लाभार्थ्यांना उपलब्ध आरोग्य सुविधांचा लाभ घेण्यासाठी मार्गदर्शन केले जाणार आहे. शासकीय योजनेंतर्गत समाविष्ट नसलेल्या काही शस्त्रक्रियाही सवलतीच्या दरात करून देण्याची सुविधा उपलब्ध असल्याची माहिती आयोजकांनी दिली आहे.

दी एज्युकेशन सोसायटीच्या पदाधिकार्‍यांचा पुढाकार
दी एज्युकेशन सोसायटी, थोरगव्हाणचे अध्यक्ष चंद्रकांत जनार्दन चौधरी, उपाध्यक्ष उमाकांत वसंत बाऊसकर, सचिव पवन हेमंत चौधरी आणि सहसचिव रामराव माधवराव देशमुख यांच्या मार्गदर्शनाखाली शिबिराचे नियोजन करण्यात आले आहे. सोसायटीच्या संचालक मंडळातील रजनीताई रामकृष्ण पाटील, चंद्रकांत गंगाधर देशमुख, राजेंद्र पुरुषोत्तम देशमुख, प्रकाश काशिनाथ बाऊसकर, कमलाकर त्र्यंबक चौधरी, नंदकुमार एकनाथराव चौधरी, मधुकर वसंत कोल्हे, संजय हरिभाऊ चौधरी, चंद्रकांत सुराजी पाटील, रवींद्र काशिनाथ चौधरी आणि दिनेश भागवतराव पाटील यांच्यासह पदाधिकारी व कार्यकर्ते शिबिराच्या यशस्वितेसाठी प्रयत्नशील आहेत. या उपक्रमाला गोदावरी फाउंडेशन संचलित डॉ. उल्हास पाटील वैद्यकीय महाविद्यालय व धर्मादाय रुग्णालय, जळगाव यांचे वैद्यकीय सहकार्य लाभणार आहे.

रुग्णांसाठी वाहन, चहा व भोजनाची व्यवस्था
थोरगव्हाणसह परिसरातील गावांमधून येणार्‍या नागरिकांसाठी वाहनांची व्यवस्था करण्यात आली आहे. तसेच शिबिरार्थींसाठी चहा आणि भोजनाची सुविधाही उपलब्ध करून देण्यात येणार आहे. परिसरातील नागरिकांनी या संधीचा लाभ घेऊन आरोग्य तपासणी करून घ्यावी, असे आवाहन आयोजकांनी केले आहे.

शिबिरासाठी संपर्क :

1. आशिष भिरुड – 9373350009
2. रत्नशेखर जैन – 7030571111
3. के. एम. पाटील – 9764494209
4. आर. के. वानखेडे – 9172095964

ग्रामीण भागातील नागरिकांना विविध आजारांची तपासणी, तज्ज्ञ डॉक्टरांचा सल्ला आणि शासकीय आरोग्य योजनांची माहिती एकाच ठिकाणी मिळणार असल्याने हे महाआरोग्य शिबिर परिसरातील नागरिकांसाठी उपयुक्त ठरणार आहे.