लाच भोवली : मारवड पोलीस ठाण्याचा पोलीस नाईक एसीबीच्या जाळ्यात

जळगाव एसीबीच्या कारवाईने लाचखोरांच्या गोटात मोठी खळबळ

अमळनेर : विनयभंगाच्या गुन्ह्यात तपासात मदत करण्यासह चार्जशीट पाठवण्यासाठी 15 हजारांची लाच मागणी करून ती स्वीकारणार्‍या मारवड पोलीस ठाण्याच्या कर्मचार्‍यास जळगाव एसीबीच्या पथकाने शनिवारी सायंकाळी अटक केल्याने लाचखोरांच्या गोटात मोठी खळबळ उडाली. पोलीस नाईक भास्कर नामदेव चव्हाण (51, रा.जुनी पोलीस लाईन, अमळनेर) असे अटकेतील आरोपीचे नाव आहे. विशेष म्हणजे आरोपीने अमळनेर शहरातील पोलीस लाईनमधील राहत्या घराजवळच तक्रारदाराकडून लाच स्वीकारली.

राहत्या घरीच स्वीकारली लाच
अमळनेर तालुक्यातील पाडसे येथील 45 वर्षीय तक्रारदार, त्यांचे वडील व भाऊ यांच्याविरोधात मारवड पोलीस ठाण्यात विनयभंगाचा गुन्हा दाखल आहे. या गुन्ह्यात मदत करून या गुन्ह्याचे चार्जशीट लवकर पाठविण्याच्या मोबदल्यात संशयीत आरोपी पोलीस नाईक भास्कर नामदेव चव्हाण यांनी शनिवार, 23 रोजी 15 हजारांची लाच मागणी केली होती. तक्रारदाराने तक्रार नोंदवल्यानंतर लाचेची पडताळणी करून सापळा रचण्यात आला. लाचेची रक्कम देण्यासाठी चव्हाण यांनी तक्रारदाराला अमळनेर शहरातील जुन्या पोलीस लाईनमधील घराजवळ बोलावले. लाचेची रक्कम स्वीकारताच पंचांसमक्ष आरोपीला अटक करण्यात आली.