प्रवाशांना मोठा दिलासा : जनरल तिकीटांसाठी विभागात 35 नवीन एटीव्हीएम मशीन

भुसावळ : कोरोनाच्या काळानंतर प्रथमच रेल्वेचे जनरल तिकीट खिडकी बुधवार, 29 जूनपासून सुरू होत आहे. तिकीट खिडकीवर प्रवाशांची होणारी गर्दी लक्षात घेता, रेल्वे प्रशासनाकडून विभागातील विविध रेल्वे स्थानकावर 35 नवीन तिकीट वेंडींग मशीन बसविण्यात आले असून 29 जूनपासून ते सुरू होणार आहे. त्यामुळे प्रवाशांची तिकीटासाठी खिडकीवरील होणारी गर्दी कमी होणार आहे, अशी माहिती सिनीयर डीसीएम डॉ.शिवराज मानसपुरे यांनी दिली. डीआरएम कार्यालयात मंगळवारी सिनियर डीसीएम डॉ. मानसपुरे यांनी पत्रकार परीषदेचे आयोजन करण्यात आले.

29 पासून जनरल तिकीट मिळणार
सिनियर डीसीएम म्हणाले की, बुधवार, 29 जूनपासून रेल्वे प्रशासनाकडून जनरल तिकीट खिडकी सुरू केली जात आहे. प्रवाशांना वेळेवर तिकीट काढता येणार आहे. कोरोनाच्या काळानंतर तिकीट खिडकी सुरू होत असल्याने तिकीट खिडकीवर होणारी संभाव्य गर्दी लक्षात घेता, रेल्वे प्रशासनाकडून संपूर्ण विभागात 35 नवीन तिकीट वेंडीग मशीन लावण्यात आल्या आहे, त्यांची चाचणी सुरू आहे, प्रवाशांना तिकीट खिडकीवर न थांबता या मशीनवरून तिकीट काढता येणार आहे. प्रवासी आता एक्स्प्रेस, मेल गाडीने सुध्दा प्रवास करू शकणार आहे. रेल्वेने सुमारे 45 लाख रूपयांचा खर्च या मशीनवर केला आहे. जनरल तिकीट सुरू होणार असून यासोबतच अपडाऊन करणार्‍यांना पास दिला जाणार आहे. रेल्वेतर्फे पाच जुलैपासून ई-टेंडरींग सुरू होणार आहे. यासाठी आतापासूनच 50 टेंडर त्यावर टाकलेे आहे. यामुळे ऑनलाईन आता बोली बोलली जाणार आहे. अवघ्या दोन दिवसात टेंडरींगची प्रक्रीया पार पडली जाणार असून तत्काळ संबंधितांना कामे दिली जाणार आहे. यात पार्कीग, वेटींग रूम, पार्सल विभाग, टॉयलेट आदीचा समावेश आहे.