बनावट नंबरप्लेट लावून दरोडेखोरांचा प्रवास : अमळनेर पोलिसांनी सतर्कतेने आवळल्या मुसक्या

The journey of robbers with fake number plates: Amalner police are vigilant अमळनेर : बनावट नंबरच्या कारमधून दरोड्याच्या उद्देशाने जाणार्‍या मालेगावच्या चार दरोडेखोरांना अमळनेर पोलिसांनी अटक केली आहे. आरोपींकडून कारसह चाकू, टॉमी जप्त करण्यात आले. अमळनेर शहरातील अमळनेर ते चोपडा रस्त्यावरील गजानन महाराज मंदिरासमोर रस्त्यावर बुधवार, 11 रोजी रात्री 3.30 वाजण्याच्या सुमारास ही कारवाई करण्यात आली.

संशय आल्याने आरोपी अडकले
अमळनेर पोलीस ठाण्यातील सहाय्यक फौजदार बापू साळुंखे व चंद्रकांत पाटील रात्री गस्तीवर असताना अमळनेर ते चोपडा रस्त्यावर इंडिगो (एम.एच.19 ए.व्ही. 5362) या चारचाकीला दुचाकीची बनावट नंबरप्लेट लावून चालकासह एकूण चार व्यक्ती जात असताना पोलिसांना संशय आल्याने त्यांनी कार अडवली. संशयीताने साहिल शेख सुलेमान (वय 22, रा. मालेगाव, विजयनगर, कुसुंबा रोड) अशी ओळख सांगितली तर त्याच्यासोबत मालेगाव येथील खालीद शहा मेहमूद शहा (21, रा.रमजानपुरा), इसरार खान जमशेर खान (23, रा.निहालनगर) व फिरोज शेख मुसा (24, रा. साहिल नगर) हे गाडीत होते. त्यांना विचारल्यानंतर त्यांनी आपण जळगाव जात असल्याचे सांगितले.