रेल्वेच्या पीओएच कारखान्यात आठ लाखांची चोरी : रेल्वे सुरक्षा बलाच्या हवालदारासह तिघांना अटक

विशेष पथकाकडून चौकशी अन् आरोपी जाळ्यात
रेल्वे सुरक्षा बलाचे डीएससी एच.श्रीनिवासराव व एएससी अशोक कुमार यांच्या नेतृत्वात चोरीच्या तपासासाठी एका पथकाची निर्मिती करण्यात आली. त्यात सीआयबी निरीक्षक एल.के.सागर, एसआयबीचे आशित शेख, विनोद खरमाटे, वसंत महाजन, अमोल पाटील, मनोज सोनवणे, इम्रान खान, महेंद्र बाबू कुशवाह, कॉन्स्टेबल गिरीराज जाधव, कॉन्स्टेबल निलेश पाटील यांचा समावेश होता. विशेष पथकाने तपासादरम्यान पीओएचमधील कंत्राटदार अंजूम पटेल यांच्याकडे काम करणारा राहुल रतन मोरे (23, महादेव टेकडी, हनुमान मंदिर कंडारी, ता.भुसावळ) यास सुरूवातीला संशयित म्हणून ताब्यात घेतले.

आरपीएफ हवालदारासोबत केली चोरी
संशयित राहुल मोरे याची कसून चौकशी केल्यानंतर त्याने चोरीकामी सचिन उत्तम तायडे (25, महादेव टेकडी, हनुमान मंदिर कंडारी, ता.भुसावळ) याचे सहकार्य लाभल्याचे सांगितल्याने त्यास गुन्ह्यात आरोपी करून त्यास अटक करण्यात आली. दोघा संशयितांच्या कबुली जवाबात आरपीएफचे हवालदार शशिकांत गणपत सुरवाडे (57, स्वामी विहार, भुसावळ) यांनी गुन्ह्यात मुद्देमाल विक्रीतून आलेली निम्मे रक्कम स्वीकारल्याचे व चोरीला प्रोत्साहन दिल्याचे स्पष्ट झाल्याने त्यांना गुन्ह्यात आरोपी करून अटक करण्यात आली. दरम्यान, गुरुवारी रेल्वे न्यायालयात वरीष्ठ सरकारी अभियोक्ता अ‍ॅड.अजयकुमार सिंग यांनी रेल्वे सुरक्षा बलाची बाजू मांडली.

कुंपणाने खाल्ले शेत : यंत्रणेची मात्र ‘चुप्पी’
रेल्वे गाड्यांमधील चोर्‍या रोखण्यासह गुन्हेगारांना पकडणे तसेच रेल्वे मालमत्तेचे संरक्षण करण्याची जवाबदारी रेल्वे सुरक्षा बलाची आहे मात्र गुन्हेगारांसोबतच थेट आरपीएफ हवालदाराने हातमिळवणी केल्याने सर्वसामान्य जनतेतून संताप व्यक्त होत आहे. रेल्वे सुरक्षा बलाच्या हवालदारावर अटकेची कारवाई झाल्यानंतरही रेल्वे सुरक्षा बलाच्या स्थानिक तपास अधिकार्‍यांसह वरीष्ठ अधिकार्‍यांकडून कुठलीही माहिती देण्यास असमर्थता दर्शवण्यात आली. दोषी कर्मचार्‍यावर आता कारवाई होते? याकडे आरपीएफ कर्मचार्‍यांचे लक्ष लागले आहे.