चाळीसगावात विद्यार्थ्यांचे शाळेत स्वागत

चाळीसगाव : चाळीसगाव एज्युकेशन सोसायटीच्या एससीआर कळंत्री प्राथमिक विद्यालय व एसएस आवटे प्रि-प्रायमरी स्कुलमध्ये बुधवारी विद्यार्थ्यांचे जल्लोषात स्वागत करण्यात आले. अनंत आमुची ध्येयासक्ती अनंत अन् आशा हा दुर्दम्य आशावाद घेऊन चिमुकली पाखरे शाळेत आली. मुलांच्या येण्याने शाळेचे प्रांगण पुन्हा एकदा फुलून आले. स्वागतोत्सवाच्या कार्यक्रमात प्रमुख अतिथी सर्वोदय शिक्षण संस्थेचे संचालक भगवान पाटील, शाळेचे चेअरमन डॉ.सुनील राजपूत, मुख्याध्यापक प्रमोद दायमा, मोराणकर, दीपाली चोरट, दीपाली पाटील आदी व्यासपीठावर उपस्थित होते. मान्यवरांच्या हस्ते सरस्वती पूजन करण्यात आले.

विविध उपक्रमातील विद्यार्थ्यांचा गौरव
मनोगत व्यक्त करताना शाळेचे चेअरमन डॉ.सुनील राजपूत यांनी विद्यार्थ्यांचे स्वागत करतांना ऑनलाईन ऑफलाईन शिक्षण तसेच कोरोनाबाबत शासकीय नियमांविषयी मार्गदर्शन करुन ‘हॅपी स्कूल’ या संकल्पनेविषयी माहिती दिली. प्रमुख अतिथी भगवान पाटील यांनी देखील मनोगत व्यक्त केले. याप्रसंगी शिष्यवृत्ती परीक्षा, एनएसएसई परीक्षा तसेच एकलव्य रेसिडेंशियल स्कुलमध्ये निवड झालेल्या विद्यार्थ्यांना गौरविण्यात आले. तसेच ऑनलाईन स्पर्धा, उपक्रमातील यशस्वी विद्यार्थ्यांनादेखील बक्षिसे देण्यात आली. गाडी चालकांचा देखील सत्कार करण्यात आला.