मध्यप्रदेशातील तरुणाची जळगावात हत्या : आरोपी कल्लूसिंगला जन्मठेपेची शिक्षा

जळगाव : शहरातील मेहरुण परीसरात भांडण सोडविण्यासाठी गेलेल्या तरुणाची चाकूने भोसकून हत्या करण्यात आली होती. या घटनेत आसाराम छोटेलाल पवार (30) यांचा मृत्यू झाला होता. याप्रकरणी गुन्ह्यातील आरोपी कल्लूसिंग शंकरसिंग राजपूत (25, रा.तेहासी, ता.खागा, जि.फतेहपूर, उत्तरप्रदेश, ह.मु. शांती नारायण नगर, मेहरूण) यास जिल्हा व सत्र न्यायालयाने जन्मठेपेची शिक्षा सुनावली.

भांडण सोडवताना घाव लागला वर्मी
मध्यप्रदेशातील खंडवा जिल्ह्यातील हरसूद तालुक्यातील कुंडिया येथील मूळ रहिवासी आसाराम छोटेलाल पवार (30) हे मेहरुण परिसरातील मंगलपूर भागात वास्तव्यास होते. 6 फेब्रुवारी 2011 रोजी सुरेश बंजारा यांचे काही लोकांशी भांडण सुरू असताना आसाराम पवार यांनी भांडण सोडवले मात्र सुरेश बंजारा यांचे जावई कल्लूसिंग शंकरसिंग राजपूत याने त्याच्या हातातील चाकू आसाराम याच्या छातीत मारुन गंभीर जखमी केले. जखमी अवस्थेत आसारामचा भाऊ दिनेशराव याने जिल्हा शासकीय वैद्यकीय रुग्णालयात दाखल केले असता उपचारादरम्यान असारामचा मृत्यू झाला. ही घटना घडल्यानंतर कल्लूसिंग राजपूत हा पसार झाला होता. याप्रकरणी एमआयडीसी पोलिस ठाण्यात संशयित आरोपी कल्लूसिंग राजपूत व जितेंद्रसिंग राजपूत यांच्याविरुद्ध गुन्हा दाखल करण्यात आला होता. त्यानंतर 8 फेब्रुवारी 2011 रोजी दोघांना अटक करण्यात आली होती. या गुन्ह्यात दोघांवर खूनाचे कलम वाढविण्यात आले होते.