यावलकरांना मोठा दिलासा : वाढीव पाणीपट्टी रद्द

Big relief for Yavalkars : Increased water tariff cancelled यावल : यावल शहरातील विस्तारीत कॉलनी भागातील रहिवाशांना वाढीव पाणीपट्टीची बिले देण्यात आली होती मात्र यावलचे माजी नगराध्यक्ष अतुल पाटील यांनी या संदर्भात तक्रार व पाठपुराव केल्यानंतर नागरीकांना मोठा दिलासा मिळाला आहे.

पाणीपुरवठा न झाल्याची माजी नगराध्यक्षांची तक्रार
पालिकेच्या माध्यमातून पाणीपुरवठा व्हावा म्हणून व्हावा म्हणून तडवी कॉलनी भागात 10 लक्ष लिटर क्षमतेचा जलकुंभ बांधण्यात आला. पाणी वितरणासाठी पाईप लाईन सुद्धा टाकण्यात आली. पाणीपुरवठा व्हावा म्हणून त्या भागातील नागरीकांनी अधिकृत रक्कम भरणा करून व आगाऊ वार्षिक पाणीपट्टी शुल्क भरणा करून नळ जोडणी केली मात्र मार्च 2022 पर्यंत पाईप लाईनद्वारे नवीन नळ धारकांना पाणी पुरवठा झाला नव्हता. अशा 328 नळधारकांना पाणीपट्टी शुल्क आकारू नये, अशी मागणी माजी नगराध्यक्ष अतुल पाटील यांनी 17 मार्च 2022 रोजी पत्र देऊन केली होती व ती मागणी मंजूरदेखील करण्यात आली होती. त्याप्रमाणे मागील वर्षी नवीन नळ धारकांना कुठलीही पाणीपट्टी न आकारता पालिकेने दिलासा दिला होता पण यंदा 2023-24मध्ये पालिकेने पाठविलेल्या पाणीपट्टी बिलात मागील वर्षाची थकबाकी 1500 रुपये + व्याज 120 रुपये व चालू वर्षाचे 1500 रुपये असे एकूण तीन हजार 120 रुपये पाणीपट्टी आकारली होती. नागरीकांना पाठविण्यात आलेल पाणीपट्टी शुल्क बेकायदेशीर असून नवीन नळ धारकांवर अन्याय करणारी असल्याने ती रद्द करण्यात यावी अन्यथा जिल्हाधिकारी यांच्याकडे दाद मागण्याचा ईशारा अतुल पाटील यांनी दिला होता.