जळगावात तरुणावर गोळीबार ; दुचाकीची टोळक्याकडून मोडतोड
वाघ नगर स्टॉपवरील घटना : जुन्या वादातून घटना ; दोन तरुण जखमी
जळगाव (30 ऑक्टोबर 2024) : शहरातील वाघ नगर स्टॉपजवळ जुन्या वादातून दुचाकीवरुन आलेल्या टोळक्याने तरुणावर गोळीबार केला. ही घटना मंगळवारी रात्री 10 वाजेच्या सुमारास घडली. यावेळी दोन दुचाकींची दगड टाकून तोडफोड करण्यात आल्याने परिसरात मोठी खळबळ उडाली.
अचानक झाला हल्ला
शहरातील वाघ नगर स्टॉप परिसरात चेतन सीताराम तायडे (26, रा.समता नगर) आणि अक्षय सुरेश लोखंडे (21, रा.समता नगर, जळगाव) हे दोन तरुण दुचाकी लावून उभे असताना मंगळवारी रात्री 10 वाजेच्या सुमारास आठ ते दहा जणांचे टोळके त्याठिकाणी आले. त्यांनी दुचाकीजवळ उभ्या असलेल्या तरुणांना मारहाण करण्यास सुरुवात केली. यावेळी टोळक्याने तरुणावर गोळीबार केला. यामध्ये चेतन तायडे या तरुणाच्या मांडीला गोळी चाटून गेल्याने तो जखमी झाला.
एका तरुणावर शस्त्राने वार घटनेची माहिती मिळताच रामानंदनगर पोलीस स्टेशनच्या कर्मचार्‍यांनी घटनास्थळी धाव घेतली. जखमी चेतन तायडे व अक्षय लोखंडे यांना शासकीय वैद्यकीय महाविद्यालय व रुग्णालयात दाखल करण्यात आले. त्या ठिकाणी उपचार सुरू आहेत. दरम्यान रुग्णालयात देखील अनेक तरुणांनी गर्दी केली होती.
टोळक्याने केलेल्या हल्ल्यात अक्षय लोखंडे या तरुणाच्या डोक्यात धारदार शस्त्राने वार करण्यात आला असून तो जखमी झाला आहे. हल्ल्यानंतर टोळक्याने त्या तरुणांच्या दुचाकींची तोडफोड केली. काही जणांनी तेथील दगड उचलून दुचाकीवर टाकून त्यांचे नुकसान झाले. यामध्ये दुचाकी (क्रमांक एमएच.19.बीडी.8624) व (एम.एच.19 ईडी.8879 क्रमांकाच्या दुचाकींचे नुकसान झाले आहे. या घटनमुळे परिसरात खळबळ उडाली आहे. दरम्यान, वाद पूर्ववैमनस्यातून झाला असल्याची माहिती आहे.
