धुळे गुन्हे शाखेची कामगिरी : चोरीच्या दहा दुचाकींसह अट्टल दुचाकी चोरट्याला अटक
धुळे जिल्ह्यातून दुचाकी चोरल्याची माहिती ः गोपनीय माहितीवरून कारवाई
Dhule Crime Branch’s performance: A persistent two-wheeler thief was arrested along with ten stolen two-wheelers. धुळे (18 फेब्रुवारी 2025) : धुळे गुन्हे शाखेने अट्टल दुचाकी चोरट्याला तब्बल चोरीच्या दहा दुचाकींसह अटक केली आहे. गमदास उर्फ गमा देवराम भील (20, पळासनेर, ता.शिरपूर) असे अटकेतील आरोपीचे नाव आहे. आरोपीने धुळे जिल्ह्यातून दुचाकींची चोरी केल्याचे स्पष्ट झाले असून आरोपीच्या ताब्यातून तीन लाख 25 हजार रुपये किंमतीच्या चोरीच्या 10 दुचाकी जप्त करण्यात आल्या.
गोपनीय माहितीवरून कारवाई
दीपक नंदू वंजारी (28, हाडाखेड, ता.शिरपूर) यांची 24 डिसेंबर 2024 रोजी रात्री 11.30 दुचाकी (एम.एच.18 बीटी 3058) चोरीला गेल्याने शिरपूर तालुका पोलिसात गुन्हा दाखल करण्यात आला. धुळे गुन्हे शाखेचे वरिष्ठ निरीक्षक श्रीराम पवार यांना ही चोरी आरोपी गमा भील याने केल्याची गोपनीय माहिती मिळाली व संशयीत पळासनेर गावातील चरणपाडा रस्त्यावर उभा असल्याचे कळताच त्यांनी पथकाला निर्देश दिल्यानंतर आरोपीच्या मुसक्या आवळण्यात आल्या. आरोपीने दहा चोरीच्या दुचाकी काढून दिल्या असून त्यातील दीपक वंजारी यांच्या दुचाकी चोरीचा गुन्हा उघडकीस आला आहे तर अन्य दुचाकींबाबत तपास सुरू आहे.
यांनी आवळल्या आरोपीच्या मुसक्या
ही कारवाई धुळे पोलीस अधीक्षक श्रीकांत धीवरे, अपर पोलीस अधीक्षक किशोर काळे यांच्या मार्गदर्शनाखाली धुळे गुन्हे शाखेचे वरिष्ठ पोलीस निरीक्षक श्रीराम पवार, संजय पाटील, पवन गवळी, आरीफ पठाण, संतोष हिरे, देवेंद्र ठाकूर, सुरेश भालेराव, पंकज खैरमोडे, मयूर पाटील, सुनील पाटील आदींच्या पथकाने केली.
