Trump tariff effect : Stock market tumbles मुंबई (4 एप्रिल 2025) : ट्रम्प टॅरिफ लागू झाल्यानंतर अमेरिकेसह जगभरातील शेअर मार्केट कोसळत असून भारतातही शुक्रवारी शेअर बाजारात मोठी घसरण दिसून आली.
यामागे एक-दोन नव्हे तर चार कारणे आहेत. पण प्रामुख्याने जागतिक मंदीची भीती आणि डोनाल्ड ट्रम्प यांनी जाहीर केलेले नवीन दर यांचा बाजार खाली आणण्यात भूमिका होती. सेन्सेक्स 930 हून अधिक अंकांनी तर निफ्टी 345 अंकांनी घसरला आहे. सर्वच क्षेत्रांत विक्री दिसून आली, विशेषत: धातू, फार्मा आणि आयटी समभागांमध्ये मोठी घसरण झाली. फार्मा सेक्टरवर वेगळे दर लागू करण्याच्या चर्चेमुळे भारतीय औषध कंपन्यांचे स्टॉक्स घसरले.
डोनाल्ड ट्रम्प यांनी अमेरिकेत आयात होणार्‍या सर्व वस्तूंवर 10 टक्के मूलभूत शुल्क लागू करण्याची घोषणा केली. भारत (26%), चीन (34%), युरोपियन युनियन (20%), दक्षिण कोरिया (25%) आणि जपान (24%) या देशांवर अतिरिक्त शुल्क लादले जाईल. यामुळे जागतिक व्यापार युद्ध सुरू होऊ शकते, त्याचा परिणाम भारतीय अर्थव्यवस्थेवरही होईल, असे तज्ज्ञांचे मत आहे.
वॉल स्ट्रीटने 2020 नंतरची सर्वात मोठी घसरण नोंदवली, ज्यामुळे आशियाई बाजारातही वेगाने विक्री झाली. जपानचा निक्केई निर्देशांक 3.4% घसरला, मार्च 2020 च्या कोविड क्रॅशनंतरचा हा सर्वात वाईट आठवडा होता. गुंतवणूकदार सुरक्षित गुंतवणुकीकडे वळले (गोल्ड, यूएस ट्रेझरी), ज्यामुळे शेअर बाजारांवर आणखी दबाव वाढला.
