एरंडोल शहरातील तरुणाचा विजेच्या धक्क्याने मृत्यू : मंडपातील आग विझवताना दुर्घटना

A young man from Erandol city died of electric shock : Accident while extinguishing a fire in a pavilion एरंडोल (13 एप्रिल 2025) : शहरातील 32 वर्षीय युवकाचा विजेचा जबर धक्क्याने शुक्रवारी मध्यरात्री मृत्यू झाला. महात्मा फुले यांच्या जयंतीनिमित्त लावण्यात आलेल्या मंडपास अचानक लागलेली आग विझवताना ही दुर्घटना महात्मा फुले पुतळ्याजवळ घडली. याबाबत एरंडोल पोलीस स्टेशनला अकस्मात मृत्यूची नोंद करण्यात आली. पंकज गोरख महाजन (32) असे मृताचे नाव आहे.

महात्मा फुले युवा क्रांती मंचच्या पदाधिका-यांसह विविध संघटनांचे पदाधिकारी व आयोजन समितीचे सदस्य कार्यक्रमाची पूर्वतयारी व नियोजन करीत होते. कार्यक्रमानिमित्त पुतळा परिसरात मंडप उभारण्यात आला होता.शुक्रवारी मध्यरात्री बारा वाजेच्या सुमारास मंडपास अचानक आग लागली. तेथे उपस्थित असलेल्या युवकांनी आग विझवण्याचा प्रयत्न केला. मंडपाला लागलेली आग विझवत असतांना पंकज गोरख महाजन याचा विजेच्या खांबास स्पर्श झाल्याने तो खाली पडला.

पंकज महाजन यास ग्रामीण रुग्णालयात नेले असता तो मयत झाल्याचे वैद्यकीय अधिका-यांनी तपासून सांगितले. याबाबत विजय महाजन यांनी दिलेल्या खबरीवरून एरंडोल पोलीस स्थानकात अकस्मात मृत्यूची नोंद करण्यात आली. तपास पोलीस निरीक्षक निलेश गायकवाड यांच्या मार्गदर्शनाखाली हवालदार विलास पाटील तपास करीत आहेत.

मयत तरुणाच्या पश्चात आई, वडील, पत्नी व तीन मुली असा परिवार आहे. दरम्यान जयंती उत्सव कार्यक्रमात सक्रीय सहभाग घेणार्‍या सहकार्‍याचा दुर्दैवी मृत्यू झाल्याने महात्मा फुले जयंतीनिमित्त आयोजित करण्यात आलेले सर्व कार्यक्रम रद्द करण्यात आले.