पारोळा रथोत्सवात महिलांच्या दागिन्यांची चोरी : बीडमधील चोरट्याला जळगाव गुन्हे शाखेने ठोकल्या बेड्या

जळगाव (मंगळवार, 3 नोव्हेंबर 2026) : पारोळा येथील रथोत्सवात गर्दीचा फायदा घेत सोन्याच्या चेन चोरी करणार्‍या बीड जिल्ह्यातील आरोपीला जळगाव स्थानिक गुन्हे शाखेच्या पथकाने बेड्या ठोकल्या आहेत. गणेश कचरू पवार (40, रा.अयोध्यानगर, बहिरवाडी, बीड) असे अटकेतील आरोपीचे नाव आहे. पोलिसांनी एकूण सहा लाख 11 हजार रुपये किंमतीचा मुद्देमाल हस्तगत केला.

गोपनीय माहितीवरून कारवाई
गुन्हे शाखेने दिलेल्या माहितीनुसार, 22 ऑक्टोबर रोजी सायंकाळी 5.30 ते 6.30 वाजेच्या सुमारास पारोळा शहरातील लवण गल्लीतील महेंद्र फोटो स्टुडीओसमोर गर्दीचा फायदा घेत तीन ते चार चोरट्यांनी तक्रारदाराच्या अंगावरील दागिने बळजबरीने हिसकावले होते. याप्रकरणी पारोळा पोलीस ठाण्यात गुन्हा दाखल करण्यात आल्यानंतर जळगाव गुन्हे शाखेकडून समांतर तपासात आरोपीबाबत माहिती मिळाल्यानंतर पथकाने बीड गाठले व आठ दिवस तळ ठोकून आरोपी गणेश कचरू पवार (40, रा.अयोध्यानगर, बहिरवाडी, बीड) यास अटक केली.