बोदवड (9 जून 2025) : क्रिकेट सामना पाहून परतणार्या खेळाडूंच्या वाहनाला अपघात झात्याने त्यात बोदवडच्या दोन खेळाडूंचा मृत्यू झाला. हा अपघात सोमवारी पहाटे सव्वा पाच वाजता अहमदनगर-संभाजीनगर महामार्गावर नेवासा तालुक्यातील उस्थळ दुमाला शिवारात घडला. प्रथमेश योगेश तेली (14, रा. जामठी दरवाजा, बोदवड) व वृषभ बबन सोनवणे (16, रा.बोदवड) अशी मृतांची नावे असून सोबत असलेले अन्य 11 जखमी खेळाडू नेवासा फाटा येथील रुग्णालयात उपचार घेत आहेत.
नेवासा पोलिसात नोंद
अपघाताची माहिती मिळताच नेवासा पोलीस ठाण्याचे पोलीस निरीक्षक धनंजय जाधव यांच्यासह पोलीस पथक तात्काळ घटनास्थळी दाखल झाले. पोलिसांनी रुग्णवाहिकेच्या साहाय्याने जखमींना तातडीने रुग्णालयात हलवले. या घटनेबाबत नेवासा पोलीस ठाण्यात अकस्मात मृत्यूची नोंद करण्यात आली आहे.
बोदवड येथील केसरी स्पोर्ट्स अकॅडमीचे 13 क्रिकेटपटू पुण्यातील गहुंजे मैदानावर आयोजित एमपीएल सामन्याला उपस्थित होते. सामना आटोपल्यानंतर हे सर्व खेळाडू क्रुझर (क्रमांक एम.एच.20 डी.जे. 4834) मधून परतत असताना उस्थळ दुमाला गावाजवळ त्यांच्या वाहनास मागून येणार्या ट्रकने जोरात धडक दिली.
या अपघातात प्रथमेश योगेश तेली (14, रा.जामठी दरवाजा, बोदवड) याचा जागीच मृत्यू झाला तर वृषभ बबन सोनवणे (वय 16, रा. बोदवड) याचा उपचारादरम्यान मृत्यू झाला. अन्य 11 खेळाडू जखमी झाले असून त्यांच्यावर नेवासा फाटा येथील रुग्णालयात उपचार सुरू आहेत. .
