भुसावळातील सातारे चौकातील रखडलेल्या 150 मीटर काँक्रीट रस्त्याला अखेर मुहूर्त
एकेरी मार्ग खुला : गवळी वाड्यातून वळवली वाहतूक
The stalled 150-meter concrete road at Satare Chowk in Bhusawal finally gets a chance भुसावळ (30 ऑक्टोबर 2025) : भुसावळ शहरातील गांधी पुतळा ते सातारे चौक या जळगाव रोडवर पालिकेने डांबरीकरणाचे काम पूर्ण झाले मात्र जळगाव रोडवर सातारे चौकातील सरदार वल्लभभाई पटेल पुतळ्याच्या परिसरात 150 मीटर अंतराच्या रस्ता काँक्रिटीकरणाचे काम रखडले होते. या कामाला अखेर मुहूर्त गवसला आहे. या कामामुळे सध्या एकेरी मार्गावरुन वाहतूक होत आहे. यावल व रावेरकडून येणारी व जाणारी वाहने गवळीवाड्यातून वळविण्यात आली आहे.
वाहन धारकांना दिलासा
गांधी पुतळा ते सतारे चौक या मार्गावर गेल्या काळात डांबरीकरण करण्यात आले. सतारे चौकात शहिद स्व. नरेंद्र महाजन ते मरिमाता मंदिरापर्यंतचा 150 मिटरचे काँक्रीटीकरण रस्ता रखडला होता. या कामाला अखेर सुरवात झाली आहे. यामुळे वाहतूक मार्गात काही बदल करण्यात आले आहे. काँक्रीटीकरण होत असलेल्या ठिकाणी जळगावकडून येणारी व जाणारी वाहने एकेरी मार्गावरुन जातील तर यावल व रावेरकडून येणार्‍या बसेस गवळी वाड्यातून वळविण्यात आल्या आहेत. पालिकेने एका बाजूचे काम पूर्ण झाल्यानंतर दुसर्‍या बाजूचे काँक्रीटीकरण करण्याचे नियोजन केल्याने वाहतूकीची मोठ्या प्रमाणात कोंडी होणार नाही. किमान एका बाजूने का असेना हा रस्ता वाहतूकीसाठी खुला आहे.
या मार्गाचाही करता येईल वापर
जळगाव रोडवरील सर्व विस्तारीत भागातील नागरिकांना मुख्य बाजारपेठ, जामनेररोड येथे जाण्यासाठी आराधना कॉलनी ते टिंबर मार्केट या रेल्वे अंडरपासचा वापर करता येणार आहे. या भागातील नागरिकांनी या मार्गाचा वापर केल्यास सतारे चौकातील कोंडी कमी होऊ शकेल.
अनेक वर्षांची मागणी पूर्ण
सतारे चौकात पाणी साचून रस्ता वारंवार खराब होत असे. आता काँक्रीटीकरण झाल्याने हा रस्ता अनेक वर्ष टिकेल. अनेक वर्षांची मागणी पूर्ण झाली आहे. यामुळे वाहनधारक तसेच जळगाव रोड व सतारे भागातील नागरिकांना दिलासा मिळणार असल्याचे या भागाचे माजी नगरसेवक मुकेश पाटील म्हणाले.
