मी चुकलो, माफी मागतो : अजित पवार
अंबाजोगाई वक्तव्यावर डॅमेज कंट्रोल ; म्हणाले जीभ घसरली, पण काम थांबणार नाही
मुंबई (26 नोव्हेंबर 2025) : सभेत बोलताना एखादा शब्द चुकीचा निघू शकतो, पण त्या शब्दाने लोकांची भावना दुखावली असेल तर त्याबद्दल क्षमा मागणे माझे कर्तव्य आहे, असे म्हणत अजित पवारांनी अंबाजोगाई येथील सभेत जीभ घसरल्याने झालेल्या वादावर त्यांनी अखेर सार्वजनिक प्रतिक्रिया देत माफी मागितली.
वापरलेला शब्द योग्य नव्हता
राष्ट्रवादी काँग्रेस पक्षाचे अध्यक्ष आणि राज्याचे उपमुख्यमंत्री अजित पवार यांनी आज अकोला जिल्ह्यातील अकोटमध्ये घेतलेल्या सभेत सांगितले की, अंबाजोगाई येथे मी जे बोललो ते शहरातील अस्वच्छतेविरोधात होते मात्र वापरलेला शब्द योग्य नव्हता, हे मला जाणवले. माध्यमांनी त्या शब्दाचा मुद्दा मोठा केला, पण ती चूक माझीच होती, अशी कबुलीही त्यांनी दिली. मी चुकीचा शब्द वापरला, भिकारपणा. तो शब्द माझ्याकडून निघायला नको होता. त्याबद्दल मी जाहीररीत्या दिलगिरी व्यक्त करतो, अशा शब्दांत त्यांनी आत्मपरीक्षण केल्याची कबुली दिली. त्यांच्या या कबुलीमुळे सभेत उपस्थित लोकांकडून टाळ्यांचा कडकडाट झाला.
अशांना आम्ही उघडे पाडू
भ्रष्टाचार आणि गुत्तेदारी यावर घणाघाती विधान करताना पवार म्हणाले की, राजकारण करायचे तर पारदर्शकपणे करा. आणि गुत्तेदारी करायची असेल तर राजकारणात पाऊल टाकू नका, अशी चेतावणी त्यांनी दिली. नगराध्यक्ष पदावर असलेल्यांच्या घरातील व्यक्तीच ठेके घेत असल्याची प्रथा वाढली आहे त्यामुळे विकासकामांचा दर्जा खाली येतो आणि नागरिकांची फसवणूक होते, अशी टीका त्यांनी नाव न घेता अनेकांवर केली. जनतेच्या पैशात डल्ला मारून राजकारण करणार्‍यांना आम्ही उघडे पाडू, असा इशाराही त्यांनी दिला.
