वैद्य उषाताई जळूकर यांचे वार्धक्याने निधन : कुटूंबाकडून देहदान
आयुर्वेद क्षेत्रातील सेवाभावाची परंपरा कायम
भुसावळ (28 नोव्हेंबर 2025) : भुसावळच्या मुळ रहिवासी आणि आयुर्वेद क्षेत्रातील प्रतिष्ठित व्यक्तिमत्त्व वैद्य उषाताई श्रीकर जळूकर (86) यांचे वृद्धापकाळाने चाळीसगाव येथे निधन झाले. प्रसिद्ध वैद्य स्व.श्रीकर (तात्या) जळूकर यांच्या त्या पत्नी होत. आयुर्वेद उपचारपद्धतीवरील अभ्यास, औषधनिर्मितीचे पारंपरिक ज्ञान आणि रूग्णसेवा या क्षेत्रांमध्ये त्यांचे योगदान उल्लेखनीय होते.
उषाताई जळूकर घरी आयुर्वेदिक औषधे तयार करून आपल्या परिसरातील अनेकांना मार्गदर्शन तसेच उपचार उपलब्ध करून देत असत. त्या आयुर्वेद संशोधन सेवा मंडळाच्या अध्यक्ष पदावरही विराजमान होत्या. समाजासाठी आयुष्यभर सेवा करण्याच्या भावनेतून त्यांनी देहदानाची इच्छा व्यक्त केली होती. त्यांच्या इच्छेनुसार त्यांचे धुळे येथील वैद्यकीय महाविद्यालयात देहदान करण्यात आले.
