भुसावळातील चर्चमध्ये नाताळ, नववर्षानिमीत्त धार्मिक-सांस्कृतिक कार्यक्रमांची रेलचेल

Churches in Bhusawal are abuzz with religious and cultural programs for Christmas and New Year भुसावळ (16 डिसेंबर 2025) : ख्रिस्त जन्मोत्सव व नूतन वर्षानिमित्त शहरातील विविध चर्चमध्ये विविध धार्मिक सांस्कृतिक कार्यक्रमांचे आयोजन करण्यात येत आहे. शहरातील अलायन्स मराठी चर्चतर्फे 17 डिसेंबर ते 1 जानेवारी दरम्यान विविध धार्मिक, सांस्कृतिक व सामाजिक कार्यक्रमांचे आयोजन करण्यात आले आहे. या कार्यक्रमांमध्ये कॅरल सिंगिंग, विशेष उपासना, चर्च स्वच्छता व सजावट, स्पर्धा, संडे स्कूल कार्यक्रम, चर्च पिकनिक तसेच वॉच नाईट सर्विसचा समावेश आहे.

उद्यापासून कार्यक्रमांची सुरूवात
कार्यक्रमांची सुरुवात बुधवारपासून संध्याकाळी 7 वाजता शहरातील विविध भागांमध्ये कॅरल सिंगिंगने होणार आहे. 18, 19 व 20 डिसेंबर रोजीही वेगवेगळ्या वसाहतींमध्ये कॅरल सिंगिंगचे आयोजन करण्यात आले आहे. रविवार (21 डिसेंबर) रोजी सकाळी प्रभुवार भक्ती व उपासना होणार असून या उपासनेस पास्टर स्वप्नील नाशिककर मार्गदर्शन करणार आहेत. 22 व 23 डिसेंबर रोजी चर्च स्वच्छता, डेकोरेशन व कॅरल सिंगिंगचे कार्यक्रम ठेवण्यात आले आहेत. 24 डिसेंबर रोजी ख्रिस्त जन्मोत्सव पूर्वसंध्येची विशेष उपासना, तर 25 डिसेंबर रोजी सकाळी ख्रिस्त जन्मोत्सवाची विशेष भक्ती आयोजित करण्यात आली आहे. याशिवाय 26 व 27 डिसेंबर रोजी विविध स्पर्धा, क्रीडा उपक्रम, निबंध लेखन व चित्रकला स्पर्धा होणार आहेत. 28 डिसेंबर रोजी संडे स्कूलचा विशेष कार्यक्रम, 29 डिसेंबर रोजी स्तुती-उपासना, तर 30 डिसेंबर रोजी चर्च पिकनिकचे आयोजन करण्यात आले आहे.