जळगावात उष्माघात कक्ष सज्ज : महापालिका रुग्णालयांमध्ये खाटा राखीव

रुग्णालयातील पुरेसे मनुष्यबळ आणि अत्याधुनिक सुविधा पाहून त्यांनी समाधान व्यक्त केले. विशेषतः रुग्णालयातील स्वच्छता आणि रुग्णांच्या सोयीसाठी लावण्यात आलेले दिशादर्शक फलक यांचे त्यांनी कौतुक केले. याप्रसंगी ट्रस्टचे अध्यक्ष प्रकाश चौबे आणि प्रशासकीय अधिकारी संतोष नवगाळे उपस्थित होते. त्यानंतर महापौरांनी शिवाजीनगर येथील भिकमचंद जैन प्रसूतीगृह रुग्णालयाला भेट दिली. या ठिकाणी सध्या केवळ क्षयरोग विभागाची ओपीडी सुरू असून प्रसूतीगृह बंद आहे. हे प्रसूतीगृह भविष्यात पुन्हा सुरू करण्याबाबत सकारात्मक कार्यवाही केली जाईल, असे महापौरांनी स्पष्ट केले. या भेटीदरम्यान कर्मचार्‍यांनी कक्ष सेवक आणि परिचारिका वर्गाची प्रचंड कमतरता असल्याचे महापौरांच्या निदर्शनास आणून दिले.

पुढील महिन्याभरात येथे रिक्त जागांवर भरती प्रक्रिया राबवता येईल का, याचा प्रशासन नक्कीच गांभीर्याने विचार करेल. यावेळी आशा वर्कर्सनी देखील महापौरांची भेट घेऊन आपल्या विविध मागण्यांचे निवेदन दिले. वाढत्या उन्हाच्या पार्श्वभूमीवर महापौरांनी दोन्ही रुग्णालयांतील उष्माघात कक्षाची विशेष पाहणी केली.या पाहणी दौर्‍यात महानगरपालिकेच्या वैद्यकीय अधिकारी मनीषा उगले, डॉ. पूजा कोल्हे, डॉ. सायली पवार यांच्यासह इतर अधिकारी व कर्मचारी उपस्थित होते. सद्यस्थितीत शाहू महाराज रुग्णालय येथे 4 खाटा राखीव तर भिकमचंद जैन रुग्णालय येथे 7 खाटा राखीव आहेत.