लंडनमध्ये राजकीय विचारांच्या इतिहासावरील आंतरराष्ट्रीय परिसंवादात प्रा.डॉ.सुनील नेवे यांचा सहभाग

भुसावळ (5 जुलै 2026) : सेकंडरी एज्युकेशन सोसायटी संचलित कला व विज्ञान महाविद्यालय, भालोद येथील राज्यशास्त्र विभागप्रमुख प्रा. डॉ. सुनील मधुकर नेवे यांनी बुधवार, 1 जुलै 2026 रोजी लंडन येथील ऐतिहासिक संशोधन संस्था आणि लंडन विद्यापीठाच्या सिनेट भवनात आयोजित ‘राजकीय विचारांचा इतिहास’ या प्रतिष्ठित आंतरराष्ट्रीय परिसंवादात सहभाग नोंदविला.

जगभरातील नामवंत प्राध्यापक, संशोधक, संशोधन विद्यार्थी आणि राजकीय विचारांचे अभ्यासक सहभागी झालेल्या या परिसंवादात लोकशाहीची उत्क्रांती, राज्यसंस्थेची संकल्पना, स्वातंत्र्य, समानता, न्याय, आधुनिक राजकीय सिद्धांत, उदारमतवाद, राष्ट्रवाद, संविधानवाद तसेच समकालीन जागतिक राजकारणातील बदल या विषयांवर सखोल विचारमंथन करण्यात आले.

या परिसंवादादरम्यान प्रा.डॉ.नेवे यांनी विविध देशांतील विद्वानांशी संवाद साधत राजकीय विचारांच्या इतिहासाचा आधुनिक लोकशाही व्यवस्थेवर होणारा प्रभाव, संशोधनातील नवे प्रवाह आणि राज्यशास्त्रातील जागतिक घडामोडींचा अभ्यास केला. या चर्चांमधून भारतीय राज्यघटना, संसदीय लोकशाही आणि भारतीय राजकीय विचार जागतिक स्तरावर अधिक प्रभावीपणे मांडण्यासाठी उपयुक्त अशा अनेक नव्या संकल्पना आणि संशोधनविषयक दृष्टिकोन समजून घेण्याची संधी त्यांना लाभली.

यापूर्वीही प्रा.डॉ.नेवे यांनी अर्जेंटिना, दक्षिण कोरिया आणि संयुक्त अरब अमिराती येथे आयोजित विविध आंतरराष्ट्रीय परिषदांमध्ये भारताचे प्रतिनिधित्व करून संशोधननिबंध सादर केले आहेत. त्यांच्या संशोधनकार्याची आंतरराष्ट्रीय शैक्षणिक क्षेत्रात दखल घेण्यात आली असून, राज्यशास्त्र विषयातील जागतिक शैक्षणिक संवादात त्यांनी सातत्याने सक्रिय सहभाग नोंदविला आहे.

इंग्लंडच्या अभ्यासदौर्‍यात त्यांनी ब्रिटिश संसदेची दोन्ही सभागृहे, राजकीय न्यायालय, भारतरत्न डॉ. बाबासाहेब आंबेडकर यांचे लंडनमधील निवासस्थान, लंडन अर्थशास्त्र विद्यालय, राष्ट्रीय कला दालन तसेच अन्य ऐतिहासिक आणि शैक्षणिक संस्थांना भेट देऊन ब्रिटिश संसदीय लोकशाही, न्यायव्यवस्था, संशोधन संस्कृती आणि सार्वजनिक प्रशासनाचा प्रत्यक्ष अभ्यास केला. या अनुभवांचा उपयोग विद्यार्थ्यांच्या अध्यापनात, संशोधनात आणि राज्यशास्त्र विषयाच्या गुणवत्तावृद्धीसाठी होणार असल्याचे त्यांनी सांगितले.

प्रा. डॉ. नेवे यांच्या या आंतरराष्ट्रीय शैक्षणिक यशाबद्दल आमदार अमोल जावळे, सेकंडरी एज्युकेशन सोसायटी, भालोदचे अध्यक्ष गणेश नेहेते, उपाध्यक्ष गोपाळ चौधरी, सचिव भास्कर पिंपळे, अध्यक्षा हेमलता ताई इंगळे, उपाध्यक्ष नारायण बापू चौधरी, प्राचार्य प्रा. डॉ. किशोर कोल्हे, मुख्याध्यापक आर. एस. जावळे, प्राथमिक शाळेच्या मुख्याध्यापिका नीलवंती बोरोले तसेच संस्थेचे सर्व पदाधिकारी, संचालक मंडळ, शिक्षक, प्राध्यापक, शिक्षकेतर कर्मचारी आणि विद्यार्थी-विद्यार्थिनी यांनी त्यांचे अभिनंदन करून पुढील शैक्षणिक व संशोधन कार्यासाठी शुभेच्छा दिल्या.

प्रा. डॉ. नेवे यांच्या या सहभागामुळे कला व विज्ञान महाविद्यालय, भालोद तसेच उत्तर महाराष्ट्रातील उच्च शिक्षण क्षेत्राला आंतरराष्ट्रीय शैक्षणिक व्यासपीठाशी जोडण्यास निश्चितच बळ मिळणार असून, विद्यार्थ्यांना जागतिक संशोधन संस्कृतीची ओळख करून देण्याच्या दृष्टीने हा अभ्यासदौरा महत्त्वपूर्ण ठरणार आहे.