नवरात्रीच्या श्रद्धेपुढे मायेचा स्पर्श हरवला? मृत नवजात बाळाला स्पर्श करण्यास आई-वडिलांचा नकार!
छत्रपती संभाजीनगरमधील घटना राज्यभरात आली चर्चेत
छत्रपती संभाजीनगर (बुधवार, 14 ऑक्टोबर 2026) : नऊ महिने पोटात वाढवलेल्या बाळाचा जन्म होताच मृत्यू झाल्याची दुर्दैवी घटना छत्रपती संभाजीनगरमध्ये समोर आली आहे मात्र, बाळाच्या मृत्यूनंतर त्याला शेवटचा स्पर्श करण्यासही आई-वडिलांनी नकार दिल्याची माहिती समोर आली आहे. नवरात्री सुरू असल्याने धार्मिक कारणास्तव मृत बाळाला हात लावता येणार नसल्याचे त्यांनी सांगितल्याचे वृत्त आहे.
खेर स्मशानभूमीत काम करणार्‍या कर्मचार्‍यांनी पुढाकार घेत या चिमुकल्याच्या अंत्यविधीची जबाबदारी पार पाडली. या घटनेमुळे परिसरात हळहळ व्यक्त होत असून श्रद्धा आणि माणुसकी यांच्यातील नात्याबाबत चर्चा सुरू झाली आहे.
नेमकी घटना काय?
नवरात्रीच्या काळात देवीची आराधना आणि पूजा अर्चा सुरू असतानाच छत्रपती संभाजीनगरमध्ये मन हेलावून टाकणारी घटना घडली. नऊ महिन्यांनंतर बाळाचा जन्म झाला मात्र जन्मानंतर लगेचच त्याचा मृत्यू झाला. त्यामुळे कुटुंबावर दुःखाचा डोंगर कोसळला मात्र नवरात्री सुरू असल्याने धार्मिक परंपरेनुसार मृत बाळाला स्पर्श करता येणार नसल्याचे कारण देत आई-वडिलांनी त्याला हात लावण्यास नकार दिल्याचे सांगितले जात आहे. परिणामी, बाळाच्या अंत्यविधीची जबाबदारी कोण घेणार? असा प्रश्न निर्माण झाला. अशा परिस्थितीत स्मशानभूमीत काम करणार्‍या कर्मचार्‍यांनी पुढाकार घेत बाळाचा अंत्यविधी पार पाडला.
जग पाहण्याआधीच या निष्पाप जीवाचा प्रवास संपला
दुःखद प्रसंगी जन्मदात्यांकडून शेवटचा स्पर्शही मिळू न शकल्याची बाब अनेकांना अस्वस्थ करणारी ठरली आहे. धार्मिक श्रद्धा आणि परंपरांचा आदर राखतानाच दुःखाच्या क्षणी माणुसकी, संवेदनशीलता आणि करुणा जपण्याचे महत्त्व या घटनेने अधोरेखित केले आहे. या घटनेबाबतची अधिकृत माहिती आणि संबंधित कुटुंबाची बाजू स्वतंत्रपणे पडताळणे आवश्यक आहे.
