कुविख्यात काल्याने पोलिसांशी हुज्जत घालत स्वतःला मारली कात्री : सहा आरोपी अटकेत

भुसावळातील हॉटेलमध्ये चाकूच्या धाकावर लूट प्रकरणात मोठी कारवाई

भुसावळ : पोलिस ठाण्यात दाखल असलेला गुन्हा मागे घ्यावा यासाठी चाकूच्या धाकावर धमकी देत टोळक्याने महामार्गावरील पंजाब खालसा हॉटेलमध्ये साहित्याची फेकाफेक करीत हॉटेल चालक सारंगधर महादेव पाटील (खडका रोड, भुसावळ) यांना चाकूच्या धाकावर जीवे ठार मारण्याची धमकी देत गल्ल्यातील सात हजारांची रोकड लांबवून पोबारा केल्याची घटना सोमवारी रात्री 10.30 वाजेच्या सुमारास घडली हेती. या प्रकरणी गुन्हा दाखल करण्यात आल्यानंतर कुविख्यात बाबा काल्यासह सहा संशयीतांना बाजारपेठ पोलिसांनी अटक केली आहे. दरम्यान, अटकेसाठी गेलेल्या पोलिसांशी हुज्जत घालत स्वतःला अंगावर कात्रीने आरोपी बाबा काल्याने वार करून घेतल्याने या प्रकरणी स्वतंत्र गुन्हा दाखल करण्यात आला.

गोळीने ठार मारण्याची धमकी देत केली लूट
हॉटेल मालक सारंगधर पाटील यांनी बाजारपेठ पोलिसात दिलेल्या तक्रारीनुसार, सोमवारी रात्री 10.30 वाजता हॉटेल बंद केल्यानंतर आरोपी आशिक बेग अस्लम बेग मिर्झा उर्फ बाबा काल्या, समीर (पूर्ण नाव नाही, रा.खडका रोड, भुसावळ), नईम (पूर्ण नाव नाही) व अन्य तीन अनोळखींनी बेकायदा हॉटेलमध्ये प्रवेश केला तर आरोपी बाबा काल्याने आपल्याविरुद्ध दाखल केलेला गुन्हा मागे घ्यावा यासाठी चाकूचा धाक दाखवत गुन्हा मागे न घेतल्यास गोळीबार करून ठार मारेल, अशी धमकी दिली तसेच अन्य आरोपींनी हॉटेलमधील खुर्च्यांसह भांड्यांची फेकाफेक तोडफोड केली तसेच आरोपींनी काऊंटर फेकत त्यातून सात हजार रुपयांची रोकड लांबवली. हा वाद सुरू असताना हॉटेलमधील कामगार जितेंद्र भावसार, ऑल्वीन अँथोनी व कमलेश परदेशी यांनी वाद सोडवल्यानंतर आरोपी पसार झाले.