किनगावात माजी विद्यार्थ्यांनी दिला 27 वर्षांपूर्वीच्या जुन्या आठवणींना उजाळा

यावल : माजी विद्यार्थ्यांचा हा उपक्रम प्रेरणादायी असून सेवनिवृत्त झालेल्या आम्हा सर्व शिक्षकांना आम्ही जणू आजही सेवा देत आहोत आणि ही मुलं आजही आमच्या समोर वर्गात आहेत, असा भास होत आम्हाला एक वेगळी ऊर्जा मिळते. विद्यार्थ्यांच्या अशा उपक्रमामुळे आमचे आरोग्य अधिक सुदृढ होत आहे, असे आम्हाला जाणवते असे प्रतिपादन माजी मुख्याध्यापक व्ही.बी.पाटील यांनी केले. ते किनगावात 1994 मध्ये इयत्ता दहावीत असलेल्या विद्यार्थ्यांनी आयोजित केलेल्या स्नेह मेळाव्यात बोलत होते. या मेळाव्यात विद्यार्थी-विद्यार्थिनींनी आपल्या शिक्षकांचा सपत्नीक सत्कार केला.

जुन्या आठवणींना मिळाला उजाळा
किनगाव, ता.यावल येथील नेहरू विद्यालयातील 1994 मध्ये इयत्ता दहावीच्या वर्गात असलेल्या विद्यार्थी- विद्यार्थिनींनी एकत्र येत स्नेह मेळावा आयोजित केला. अध्यक्षस्थानी सेवानिवृत्त मुख्याध्यापक व्ही.बी.पाटील होते. प्रमुख उपस्थितांमध्ये शिक्षक पी.जी.पाटील, जी.एम.महाजन, आर.एस.सोनवणे, आर.एस.पाटील, ए.एफ.पाटील, पी.एन.सुरवाडे, एन.बी.मोरे, शिक्षिका सरोज पाटील यांची उपस्थिती होती. या कार्यक्रमात माजी विद्यार्थ्यांनी आपल्या त्यावेळेच्या सर्व शिक्षक यांना एकत्र बोलावून विशेष म्हणजे त्यांच्या अर्धांगिनीचा देखील सत्कार केला. सपत्नीक झालेल्या या सत्काराने उपस्थित शिक्षक भारावले. या कार्यक्रमांमध्ये सैनिक जवान विजय धांडे, मधुकर ठाकूर, दीपक पाचपोळे, हुसेन तडवी यांना देखील सन्मीत करण्यात आले. अध्यक्षीय मनोगतात बोलतांना सेवानिवृत्त मुख्याध्यापक व्ही.बी.पाटील हे अतिशय भाऊक झाले.