‘कौन बनेगा करोडपती’ची लॉटरी लागल्याचे आमिष दाखवत तीन लाखांचा गंडा

जळगाव : कौन बनेगा करोडपतीची 25 लाखांची लॉटरी लागल्याचे भासवून जळगाव जिल्ह्यातील एका तालुक्यातील महिलेची दोन लाख 92 हजार 709 रुपयांत ऑनलाईन फसवणूक करण्यात आली. या प्रकरणी जळगाव सायबर पोलिसात गुन्हा दाखल करण्यात आला.

लॉटरीच्या आमिषाने गंडवले
जळगाव जिल्ह्यातील एका तालुक्यातील 40 वर्षीय महिलेला 8 नोव्हेंबर रोजी अनोळखी क्रमांकावरुन फोन आला. फोनवर बोलणार्‍या संबंधितांने महिलेला तुम्हाला 25 लाख रुपयांची कौन बनेगा करोडपतीची लॉटरी लागली आहे, असे सांगितले. त्यानंतर वेगवेगळ्या नंबरवरुन वेगवेगळ्या नावांनी संबंधितांनी फोन करुन महिलेचा विश्‍वास संपादन करण्यात आला तसेच लॉटरी लागलेले 25 लाख रुपये मिळविण्यासाठी इन्कम टॅक्स व इतर चार्जेसच्या नावाखाली महिलेला ऑनलाईन पैसे पाठविण्यास सांगितले. त्यानुसार महिलेने संबंधितांना दहा दिवसात वेळोवेळी दोन लाख 92 हजार 709 रुपये ऑनलाईन पाठविले. पैसे स्विकारल्यानंतर महिलेला कुठल्याही प्रकारचे लॉटरी लागल्याचे पैसे मिळाले नाही. अखेर आपली फसवणूक झाल्याची खात्री झाल्यावर महिलेने बुधवार, 17 नोव्हेंबर रोजी जळगाव सायबर पोलिसात तक्रार दिली. त्यावरुन वेगवेगळ्या नावाने वेगवेगळ्या क्रमाकांवरुन फोन करणार्‍या अनोळखी व्यक्तीविरोधात गुन्हा दाखल झाला आहे. पुढील तपास पोलीस निरीक्षक लिलाधर कानडे करीत आहेत.