मंत्री परबांच्या जवळील अधिकार्‍याकडे आढळली कोट्यवधींची बेहिशेबी संपत्ती : आयकराच्या छापेमारीत बाब उघड

दहा वर्षात कोट्यवधींची मालमत्ता
या अधिकार्‍याने गेल्या दहा वर्षांत पुणे, सांगली, बारामती आदी ठिकाणी मालमत्ता खरेदी केली आहे. त्याच्या नावावर पुणे परिसरात एक बंगला आणि फार्म हाऊस, तळेगाव भागात एक फार्महाऊस, सांगलीत दोन बंगले, दोन हिर्‍यांची दुकाने, पुण्यात पाच सदनिका, नवी मुंबईत एक सदनिका आहे. सांगली, बारामती व पुणे भागात मिळून 100 एकरपेक्षा जास्त जमीन आहे. इलेक्ट्रॉनिक उत्पादने, हिर्‍याच्या दागिन्यांचा व्यवसाय, बांधकाम, रिअल इस्टेट आणि पाईप उत्पादन व्यवसायात गुंतवणूक केली आहे. बांधकाम व्यवसाय त्याच्या परीवारातील सदस्य चालवितात. अधिकार्‍यांशी संबंधातून त्यांने अनेक सरकारी ठेके मिळविल्याचे आयकर विभागाच्या तपासणीत स्पष्ट झाले.

कर चुकवेगिरीचा अभ्यास
बांधकाम व्यवसायातील कर चुकवेगिरीचा तपास आता सुरु करण्यात आला आहे. बारामतीमधील एका जमिनीच्या व्यवहारात दोन कोटींची मिळकत झाल्याचे तपासात स्पष्ट झाले. छापेमारीत रोख 66 लाख रुपये जप्त करण्यात आले. आयकर आयुक्त सुरभी अहलुवालीया यांनी ही माहिती दिली.

बनावट कागदपत्रांद्वारे 27 कोटींची कंत्राटे
दरम्यान, संबंधित अधिकार्‍याने बनावट दस्ताऐवज वापरुन तब्बल 27 कोटींची सरकारी कंत्राट मिळविल्याचेही छापेमारीत स्पष्ट झाले आहे. बारामतीमधील छापेमारीत दोन कोटींची बेहिशेबी रक्कम मिळाली. जमिनीच्या विक्रीतून ती मिळाल्याचे दिसून आले. छापेमारीत संगणकातील माहिती व महत्वाची कागदपत्रे ताब्यात घेतली आहेत. एका सामान्य आरटीओ अधिकार्‍याची ही कमाई पाहून आयकर विभागही चक्रावून गेला आहे.