नागपूरात ईडीची छापेमारी : काँग्रेस प्रदेशाध्यक्षांचे वकील सतीश उके यांच्या घरात झाडाझडती
ED Raid At Nagpur नागपूर : नागपूर येथील वकील सतीश उके यांच्या घरावर ईडीने छापा टाकला असल्याचे वृत्त आहे. याआधी सतीश उके यांनी विरोधी पक्षनेते देवेंद्र फडणवीस यांच्या विरोधातील याचिकेत सतीश उके यांनी काँग्रेस प्रदेशाध्यक्ष नाना पटोले यांची बाजू मांडली होती.
ईडीच्या छापेमारीने खळबळ
गुरुवारी सकाळपासूनच उके यांच्या नागुपरातील निवासस्थानी अंमलबजावणी संचलनालयाच्या अधिकार्‍यांकडून झाडाझडती सुरू आहे मात्र ही छापेमारी नेमक्या कोणत्या प्रकरणात सुरूआहे हे अद्याप स्पष्ट झालेलं नाही. अ‍ॅड. सतीश उके यांनी माजी मुख्यमंत्री आणि विरोधी पक्ष नेते देवेंद्र फडणवीस यांच्या विरोधात निवडणूक याचिका दाखल केली होती तर काँग्रेस प्रदेशाध्यक्ष नाना पटोले यांच्या बाजूने फोन टॅपिंग प्रकरणात केस लढवली होती.
क्राईम ब्रँचनेही बजावली होती नोटीस
पार्वती नगर भागातील निवासस्थानी गुरुवारी पहाटे 5 वाजताच्या सुमारास ईडी अधिकार्‍यांनी छापा टाकला. सध्या अ‍ॅड.सतीश उके आणि त्यांचे भाऊ प्रदीप उके घरी आहेत. नागपुरातील एका जमीन व्यवहाराच्या संदर्भात उकेंना क्राईम ब्रांचने नोटीस बजावली होती. या प्रकरणाशी संबंधित ही छापेमारी असण्याची शक्यता वर्तवली जात आहे. उकेंच्या घराबाहेर सीआरपीएफ जवान आणि पोलिसांचा बंदोबस्त तैनात करण्यात आला आहे.
