नंदुरबार : शिवसेनेचे जिल्हाप्रमुख आमशा पाडवी यांना बळ देण्यासाठी विधानपरीषदेच्या निवडणुकीसाठी शिवसेनेने उमेदवारी जाहीर केली आहे. आगामी विधानसभा निवडणुका डोळ्यासमोर ठेऊन अक्राणी विधानसभा मतदार संघात सेनेचा भगवा फडकविण्यासाठी शिवसेनेने ही खेळी खेळल्याचे बोलले जात आहे.
मंत्री पाडवींना दिली होती टक्कर
आमशा पाडवी यांनी गेल्या विधानसभा निवडणुकीत आदिवासी विकास मंत्री के.सी.पाडवी यांना चांगलीच टक्कर दिली होती. अवघ्या 1200 मतांनी त्यांचा पराभव झाला होता. हा निसटता पराभव लक्षात घेऊन भविष्यातील राजकारणाच्या दृष्टीने पाडवी यांना शिवसेनेतर्फे उमेदवारी देण्यात आली आहे. पाडवी हे मुंबईत असून जिल्ह्यातील काही शिवसेना नेतेही मुंबईकडे रवाना झाले आहेत.
10 जागांसाठी 20 जूनला निवडणूक
विधान परिषदेच्या रीक्त झालेल्या 10 जागांसाठी 20 जून रोजी निवडणूक होत आहे. या निवडणुकीत शिवसेनेकडून जिल्हाध्यक्ष आमशा पाडवी यांना संधी देण्यात आली आहे. उमेदवारी अर्ज दाखल करण्यासाठी पाडवी मुंबईत दाखल झाले आहेत त्यामुळे त्यांची निवड निश्चित मानली जात आहे. यासोबतच नंदुरबार जिल्ह्यात शिवसेनेच्या आमदारांचे खातेदेखील उघडणार आहे असल्याने सातपुड्याच्या एकतर्फी राजकारणात यापुढे स्पर्धा निर्माण होणार आहे.
