भुसावळ शहरात गावठी पिस्टलासह 24 वर्षीय संशयीत जाळ्यात

24-year-old suspect nabbed with village pistol in Bhusawal town भुसावळ (7 नोव्हेंबर 2024) : बाजारपेठ पोलिसांनी गोपनीय माहितीच्या आधारे अक्सा नगरातील 24 वर्षीय संशयीताला अटक केली आहे. ही कारवाई खडका रोडवरील नवीन ईदगाह जवळ बुधवार, 6 नोव्हेंबरला रात्री 7.30 वाजता करण्यात आली. याकूब मोहम्मद खान (24, रा.अक्सानगर, भुसावळ) असे अटकेतील आरोपीचे नाव आहे.

गोपनीय माहितीवरून कारवाई
बाजारपेठ पोलीस निरीक्षक राहुल यांना संशयीत काहीतरी गंभीर स्वरूपाचा गुन्हा करण्याच्या उद्देशाने सोबत गावठी पिस्टल घेवून फिरत असल्याची माहिती मिळाल्यानंतर त्यांनी पथकाला कारवाईचे आदेश दिले. बुधवारी संध्याकाळी 7.30 वाजेच्या सुमारास पोलिसांनी संशयावरून याकुबची चौकशी केली असता त्याच्याजवळ एक गावठी पिस्टल व काडतूस आढळल्याने त्यास अटक करण्यात आली. 15 हजार रुपये किंमतीचे पिस्टल व एक हजार रुपये किंमतीचे काडतूस जप्त करण्यात आले. पोलीस निरीक्षक राहुल वाघ यांच्या मार्गदर्शनाखाली हवालदार विजय नेरकर तपास करीत आहे.

यांनी केली कारवाई
ही कारवाई भुसावळचे पोलीस उपअधीक्षक कृष्णात पिंगळे, भुसावळ बाजारपेठ पोलीस निरीक्षक राहुल वाघ यांच्या मार्गदर्शनाखाली पोलीस उपनिरीक्षक मंगेश जाधव, हवालदार विजय नेरकर, हवालदार निलेश चौधरी, हवालदार महेश चौधरी, कॉन्स्टेबल प्रशांत परदेशी, कॉन्स्टेबल योगेश माळी, कॉन्स्टेबल राहुल वानखेडे, कॉन्स्टेबल भूषण चौधरी, कॉन्स्टेबल प्रशांत सोनार, कॉन्स्टेबल अमर अढाळे आदींच्या पथकाने केली.