चारित्र्याच्या संशयातून पत्नीलाच संपवले : धरणगाव तालुक्यातील घटना
Wife killed over suspicion of character : Incident in Dharangaon taluka धरणगाव (28 मार्च 2025) : धरणगाव तालुक्यातून एक धक्कादायक बातमी समोर आली आहे. चारित्र्याच्या संशयावरून माथेफिरू पतीने आपल्या पत्नीची हत्या केली तर मुलावर हल्ला केल्याचा प्रकार समोर आला आहे. शीतल उर्फ आरती सोमनाथ सोनवणे असे ठार विवाहितेचे नाव आहे. धरणगाव तालुक्यातील हनुमंतखेडा येथे भयंकर घटना घडली.
आरोपी सोमनाथ उर्फ सोन्या अशोक सोनवणे हा आपली पत्नी शीतल उर्फ आरती हिच्यावर नेहमी चारित्र्याबाबत संशय घेऊन मारहाण करीत होता. त्यातच गुरुवारी मध्यरात्रीनंतर आरोपीने आपली पत्नी शीतल उर्फ आरती हिच्यावर कुर्‍हाडीने वार केले. यात तिचा मृत्यू झाला. याप्रसंगी त्याने आपला दहा वर्षाचा मुलगा सिध्दू सोमनाथ सोनवणे याच्यावरही वार केले असून तो देखील गंभीर जखमी झाला.
या घटनेमुळे परिसरात एकच खळबळ उडाली आहे. या प्रकरणी मयत शीतल उर्फ आरती सोमनाथ सोनवणे हिचा भाऊ भाऊसाहेब भावलाल पवार (रा. हनुमंतखेडा, ता.धरणगाव) यांनी पोलीस स्थानकात फिर्याद दिल्यावरून सोमनाथ उर्फ सोन्या अशोक सोनवणे याच्या विरोधात गुन्हा दाखल करण्यात आला. पुढील तपास पोलीस निरिक्षक पवन देसले यांच्या मार्गदर्शनाखाली सहा.निरीक्षक निलेश वाघ, उपनिरीक्षक संतोष पवार व हवालदार राजू पाटील हे करत आहेत.
