लोकांच्या उदार दायित्वातुन चालतय यावलचे वृध्दाश्रम : 14 वृध्दांना दिली जातेय सेवा

यावल (2 जुलै 2026) : शहरातील बालाजी सिटीमध्ये लोकांच्या उदारदायित्वातून यशोदायी वृध्दाश्रम चालवले जात आहे. दानशूर व्यक्तीमत्वांच्या माध्यमातुन मिळणारे अन्नदानासह भेट वस्तू, अन्न धान्यातून या वृध्दाश्रमात 14 वृध्दांना सेवा दिली जाते. विशेष म्हणजे या वृध्दाश्रमातील वृध्दांना कुटुंबासारखी वागणूक देत त्यांचे वाढदिवस देखील साजरे करून समाजापुढे हा वृध्दाश्रम एक आदर्श ठरत आहे.

14 वृद्धांना मिळतेय सेवा
यावल शहरातील भुसावळ रस्त्यालगत असलेल्या बालाजी सिटीमध्ये यशोदाआई वृध्दाश्रम आहे. या वृध्दाश्रम संस्थेचे अध्यक्ष पंकज बारी, उपाध्यक्ष नरेंद्र पाटील, सचिव विजय सावकारे यांच्या मध्यमातून येथे 14 वृध्दांना सेवा दिली जात आहे. या वृध्दाश्रमातील वृध्दांच्या सर्व गरजा भागवतांना समाजातीलच दानशूर व्यक्तीमत्वाची मदत होत आहे. अनेक जण आपला वाढदिवस, लग्नाचा वाढदिवस तसेच कुटुंबातील कुणी मयत झाल्यास त्यांचे उत्तर कार्य, वास्तुशांती सारख्या कार्यक्रमातील वायफळ खर्च टाळून या वृध्दाश्रमात करत असलेल्या मदतीतून येथे सेवा देण्यात येत आहे. येथे वास्तव्यास वृध्दांना सेवा देत असतांना त्यांना कुटुंबासारखी वागणून देखील दिली जाते. यात वृध्दाचे वाढदिवस देखील केक आणुन साजरे केले जातात. त्यांच्या सुख दुखात संस्थेचे पदाधिकारी त्यांच्या सोबत उभे राहून त्यांना बळ देतांना येथे दिसतात.