भुसावळात पाणी पेटले : पालिकेत रिपब्लिकन सेनेचे ‘मटके फोडो’ आंदोलन

Water Issue Ignites Tensions in Bhusawal: Republican Sena Stages ‘Matke Phodo’ (Pot-Smashing) Protest at Municipal Council भुसावळ (3 जुलै 2026) : शहरातील तीव्र पाणीटंचाईच्या प्रश्नावर रिपब्लिकन सेनेने शुक्रवार, 3 रोजी भुसावळ नगरपरिषदेत आक्रमक पवित्रा घेत ‘मटके फोडो’ आंदोलन करत प्रशासनाचा निषेध नोंदविला. शेळगाव बॅरेज आणि हतनूर धरणात मुबलक पाणीसाठा उपलब्ध असतानाही नगरपरिषदेच्या ढिसाळ नियोजनामुळे नागरिकांना पाणीटंचाईला सामोरे जावे लागत असल्याचा आरोप संघटनेने केला.
रिपब्लिकन सेनेने यापूर्वी नगरपरिषदेला 48 तासांचा अल्टिमेटम दिला होता. मात्र, त्यानंतरही प्रशासनाकडून ठोस उपाययोजना न झाल्याने दुपारी 12 वाजता नगरपरिषदेसमोर आंदोलन करण्यात आले.

तर अधिकार्‍यांना काळे फासणार
रिपब्लिकन सेनेचे जिल्हाध्यक्ष विनोद सोनवणे म्हणाले की, शेळगाव बॅरेज आणि हतनूर धरणामध्ये पुरेसा पाणीसाठा उपलब्ध असताना केवळ नगरपरिषदेच्या नियोजनातील त्रृटींमुळे भुसावळकरांना पाणीटंचाईचा सामना करावा लागत आहे. नागरिकांवर होत असलेला हा अन्याय सहन केला जाणार नाही. भुसावळातील पाणीप्रश्न न सुटल्यास प्रसंगी अधिकार्‍यांच्या तोंडाला काळे फासण्यात येईल.