भुसावळात पथदिवे, हायमास्ट दुरुस्ती बंद कारण 15 महिन्यांपासून ठेकेदाराला बिल दिलेच नाही

आर्थिक अडचण वाढल्याने निर्णय
शहरातील सेंट्रल पोल, अंतर्गत भागातील छोटे आणि मोठे हायमास्ट दिवे दुरुस्त करण्याचे कंत्राट ठेकेदाराकडे आहे मात्र गेल्या सव्वा वर्षापासून या कामाचे बिल पालिकेने अदा केलेले नाही. बिल रखडल्यामुळे ठेकेदाराची आर्थिक अडचण वाढली आहे. नवीन साहित्याचा पुरवठा करणे आणि कर्मचार्‍यांचे पगार देणे ठेकेदाराला अशक्य झाल्याने, 10 दिवसांपूर्वी दुरुस्तीचे काम बंद केले. शहरातील अनेक भागातील पथदिवे बंद आहेत. या गंभीर समस्येबाबत नागरिकांनी आणि संबंधित घटकांनी यापूर्वी अनेकदा तक्रारी केल्या.

सत्ताधार्‍यांबद्दल वाढतोय रोष
आगामी काळात गणेशोत्सव आहे. या काळात भाविक रात्री उशिरापर्यंत रस्त्यावर असतात. याच काळात रस्त्यांवर अंधार कायम राहिला तर छेडखानी, चोरी आदी प्रकार घडू शकतात. यामुळे प्रशासन व सत्ताधार्‍यांबद्दल रोष वाढू शकेल. पालिकेने पथदिवे सुरु करण्यासाठी प्रयत्न करावे.

अंधाराने गैर प्रकाराची वाढली भीती
अंतर्गत गल्ल्यांमध्ये अंधार असल्याने अपघातांचे प्रमाण वाढले असून चोरीच्या घटनांची भीतीही वाढली आहे. पथदिवे सुरू करण्यासाठी पालिकेकडे तक्रारी करत आहेत मात्र कंत्राटदार कामावर नसल्याने दररोजच्या 125 ते 130 तक्रारी प्रलंबित आहे. पालिका प्रशासन आता तरी यावर तातडीने तोडगा काढून ठेकेदाराचे बिल देणार की शहर असेच अंधारात राहणार, असा संतप्त सवाल नागरिक विचारत आहेत.