डॉ.नितु पाटील पॅटर्न सर्वांसाठी प्रेरणादायी

माजी मंत्री गिरीश महाजन यांची कौतुकाची शाबासकी

भुसावळ : शेतकर्‍यांच्या हितासाठी केंद्र सरकारने कृषी विधेयक मंजूर केले आहे. त्याबद्दल जास्तीत-जास्त शेतकर्‍यांना आणि शेत कामगारांना माहिती व्हावी, त्यांच्या मनातील संभ्रम दूर व्हावा, यासाठी प्रत्येक भाजप कार्यकर्त्यांनी झटून प्रयत्न करावा,असे आवाहन केंद्रीय कृषी आणि शेतकरी कल्याण मंत्री नरेंद्र सिंह तोमर यांनी केले होते आणि त्याच आवाहनाला सकारात्मक प्रतिसाद भारतीय जनता पार्टी वैद्यकीय आघाडीचे उत्तर महाराष्ट्र सह संयोजक डॉ.नितु पाटील यांनी त्यांच्या कृती द्वारे दिला आहे, असे प्रतिपादन माजी वैद्यकीय शिक्षण मंत्री तथा भारतीय जनता पार्टी वैद्यकीय आघाडीचे महाराष्ट्र प्रभारी आमदार गिरीश महाजन यांनी केले आहे.

मुंबईत प्रशिक्षण शिबिर
वैद्यकीय आघाडी महाराष्ट्र प्रदेशचे दोन दिवसीय निवासी प्रमुख पदाधिकारी राज्यस्तरीय प्रशिक्षण शिबिर हे मुंबईला रामभाऊ म्हाळगी याठिकाणी सुरू असून त्यात सदर औषधपत्रकाचे अनावरण करण्यात आले. डॉ.नितु पाटील हे वरणगाव येथील प्रसिद्ध नेत्र तज्ञ असून विविध सामाजिक उपक्रमांसाठी त्यांचे योगदान मोलाचे आहे. रुग्णांना तपासणी पेपरवर औषधी लिहून दिल्यावर शक्यतो कागदाची दुसरी बाजू ही कोरीच राहते, हे लक्षात ठेवून त्यावर केंद्रीय कृषी आणि शेतकरी कल्याण मंत्री नरेंद्र सिंह तोमर मंत्री यांनी शेतकर्‍यांना दिलेले आश्वासन छापून येणार्‍या सर्व रुग्णांना त्याविषयी माहिती दिली जात आहे, असा हा अभिनव उपक्रम राबवणारे डॉ.नितु पाटील हे आमचे सक्रिय एकनिष्ठ कार्यकर्ते आहेत, याचा आम्हांला अभिमान असल्याचे आमदार गिरीश महाजन म्हणाले.