भुसावळातील आजी-नगरसेवकांवर कारवाईची टांगती तलवार

भुसावळात विधानसभा निवडणुकीच्या तोंडावर आजी-माजी नगरसेवकांकडे धडकल्या नोटीसा : 3 ते 6 ऑक्टोबरदरम्यान जळगाव आर्थिक गुन्हे शाखेत होणार चौकशी

भुसावळ- भुसावळ पालिकेतील घनकचरा प्रकल्पासह, बाजार मक्ता फी, इंग्लिश स्पीकींग क्लास, विविध रस्त्यांचे डांबरीकरण व अन्य नऊ प्रकरणांमध्ये मोठ्या प्रमाणावर भ्रष्टाचार झाल्याची तक्रार दाखल झाल्यानंतर खंडपीठात हे गुन्हे सीबीआयकडे तपासासाठी वर्ग करण्याची मागणी करण्यात आली होती तर दुसरीकडे जळगाव आर्थिक गुन्हे शाखेकडे या गुन्ह्यांचा तपास सुरू असताना एका गुन्ह्यासंदर्भात दोषारोपपत्र तर दोन गुन्ह्यासंदर्भात सी फायनल अहवाल न्यायालयात सादर करण्यात आला आहे. दरम्यान, उर्वरीत सहा गुन्ह्यांच्या तपासाबाबत खंडपीठात सुनावणी झाल्यानंतर न्या.टी.व्ही.नलावडे व न्या.के.के.सोनवणे यांनी 10 ऑक्टोबरपर्यंत तपासाधिकार्‍यांना या सर्व गुन्ह्यांचे कागदपत्रे घेवून हजर राहण्याचे आदेश बजावले असून दुसरीकडे खंडपीठाने हे प्रकरण गांभीर्याने घेतल्यानंतर जळगाव आर्थिक गुन्हे शाखेने 28 रोजी भुसावळातील आजी-माजी नगरसेवकांना चौकशीकामी नोटीसा बजावल्या आहेत. 3 ते 6 ऑक्टोबरदरम्यान नगरसेवकांची खोलवर चौकशी होणार असून प्रसंगी त्यांच्यावर अटकेचीदेखील कारवाई होण्याची दाट शक्यता आहे.

नऊ प्रकरणांमध्ये अपहार झाल्याची तक्रार
भुसावळातील पेन्शनर्स असोसिएशनचे अध्यक्ष एस.एल.पाटील यांनी भुसावळ पालिकेत तब्बल नऊ प्रकरणांमध्ये लाखो रुपयांचा भ्रष्टाचार झाल्याचा आक्षेप घेत सर्वोच्च न्यायालयात धाव घेतली होती मात्र सर्वोच्च न्यायालयाने उच्च न्यायालयात जाण्याचा सल्ला दिल्यानंतर पाटील यांनी औरंगाबाद खंडपीठात रीट दाखल केल्यानंतर नऊ गुन्ह्यांचा तपास सीबीआयकडे वर्ग करण्याबाबत रीट याचिका दाखल केली होती शिवाय बाजारपेठ पोलिसात सुरूवातीला नऊ गुन्हे दाखल झाल्यानंतर फसवणुकीचा गुन्हा हा जळगाव आर्थिक गुन्हे शाखेकडे वर्ग करण्यात आला होता. दरम्यानच्या काळात अनेक नगरसेवकांचे जाब-जवाब नोंदवण्यात आले मात्र पाच वर्षांच्या काळात अद्यापपर्यंत एकालाही अटक झाली नाही शिवाय शासनाच्या निधीची रीकव्हरीदेखील झाली नाही.

तीन प्रकरणांबाबत अहवाल सादर
आर्थिक गुन्हे शाखेने तीन गुन्ह्यांचा तपास करताना एका गुन्ह्याबाबत दोषारोपप त्र सादर केले तर दोन गुन्ह्यांचे प्रकरण हे गुन्ह्यात मोडले जात नसल्याचे शपथपत्र खंडपीठात सादर केले होते मात्र सहा गुन्ह्यांबाबत अतिशय संथपणे कारवाई सुरू असतानाच खंडपीठाने ही बाब गांभीर्याने घेत मध्यंतरी जळगाव पोलिस अधीक्षकांना या प्रकरणांमध्ये वैयक्तिक लक्ष घालण्याचे आदेश दिले होते. गत महिनाभरात या प्रकरणात झालेल्या सुनावणीनंतर 26 रोजी पुन्हा औरंगाबाद खंडपीठात न्या.टी.व्ही.नलावडे व न्या.के.के.सोनवणे यांच्या न्यायासनासमोर सुनावणी झाल्यानंतर जळगाव गुन्हे शाखेच्या तपासाधिकार्‍यांना 10 ऑक्टोबर रोजी गुन्ह्यांची सर्व कागदपत्रे व तपासाचा प्रोग्रेस रीपोर्टसह हजर राहण्याचे बजावण्यात आल्याचे समजते.

…तर आजी-माजी नगरसेवकांना अटक
भुसावळ पालिकेतील घनकचरा प्रकल्पासह, बाजार मक्ता फी, इंग्लिश स्पीकींग क्लास, विविध रस्त्यांचे डांबरीकरण यासह अन्य नऊ प्रकरणांबाबत दाखल गुन्ह्यांमध्ये अनेक विद्यमान नगरसेवकांसह माजी नगरसेवकांविरुद्ध गुन्हे दाखल आहेत. जळगाव आर्थिक गुन्हे शाखेकडून गेल्या पाच वर्षांपासून तपास सुरू असताना अद्याप कुणालाही अटक झालेली नाही मात्र खंडपीठाने ही बाब गांभीर्याने घेतल्याने व 3 ते 6 ऑक्टोबरदरम्यान आरोपी असलेल्या आजी-माजी नगरसेवकांना चौकशीकामी बोलावण्यात आल्यानंतर संबंधिताना कुठल्याही अटक होवू शकते, असेदेखील संकेत आहेत.

तपासाची माहिती उघड करता येणार नाही -परदेशी
तपासाधिकारी व पोलिसा निरीक्षक दत्तात्रय परदेशी म्हणाले की, 3 ते 6 दरम्यान सहा प्रकरणांमध्ये आरोपी असलेल्या आजी-माजी नगरसेवकांना चौकशीकामी बोलावण्यात आले आहे. अटक करायची वा नाही हा तपासाचा भाग असल्याचे त्यांनी सांगत अधिक माहिती देण्यास नकार दिला.