स्थानिक पदाधिकार्‍यांची मदत नाही मग राष्ट्रवादी पक्ष वाढणार कसा?

Rawer NCP Mitting रावेर : स्थानिक पदाधिकारी तालुक्याचे दौरे सोडून मुंबईचे दौरे करतात त्यामुळे स्थानिक स्तरावर त्यांची आम्हाला मदत मिळत नाही त्यामुळे राष्ट्रवादी पक्ष आम्ही वाढवायचा कसा? असा अंतर्मुख करणारा प्रश्न रावेरात कार्यकर्त्यांनी राष्ट्रवादीच्या बैठकीत उपस्थित केला. स्वकीयांच्याच आरोप-प्रत्यारोपांमुळे राष्ट्रवादीची बैठक चांगलीच गाजली. विशेष म्हणजे हा प्रकार उपमुख्यमंत्री अजित पवार यांचे निकटवर्तीय मानले जाणारे अविनाश आदीक यांच्या समोरच घडला तर त्यांना काही वेळ आपल भाषणदेखील थांबवण्याची नामुष्की ओढवली. अध्यक्षीय भाषण न होताच बैठक गुंढाळण्यात आली.

तक्रारींच्या पाढ्यामुळे गाजली बैठक
रावेरात राष्ट्रवादीची आढावा बैठक आगामी निवडणुकांच्या पार्श्वभूमीवर कृषी उपन्न बाजार समितीत माजी आमदार अरुण पाटील यांच्या अध्यक्षतेखाली झाली. बैठकीला निरीक्षक अविनाश आदीक यांची प्रमुख उपस्थिती होती.
बैठकीत सेवादल प्रदेश उपाध्यक्ष प्रकाश पाटील व राजेश वानखेडे यांनी पक्षातील स्वकीयांच्या तक्रारीचा पाढा वाचला तर तालुक्यातील जबबादार राष्ट्रवादीचे पदाधिकारी तालुका सोडुन मुंबईचेच दौरे करीत असल्याने स्थानिक पातळीवर आम्हाला त्यांची कुठलीच मदत होत नाही त्यामुळे संघटन वाढवण्यास आम्हाला तालुक्यात प्रचंड त्रास होत असल्याची खदखद राष्ट्रवादीतील स्थानिक पदाधिकार्‍यांनी व्यक्त केली.