चाळीसगाव (26 डिसेंबर 2024) : चाळीसगाव तालुक्यातील बहाळ ग्रामपंचायतीच्या सरपंचासह तिघांना धुळे एसीबीने अटक केली आहे. या कारवाईने ग्रामपंचायत वर्तुळातील लाचखोरांमध्ये प्रचंड खळबळ उडाली आहे. सरपंच राजेंद्र महादू मोरे (57), ग्रामपंचात शिपाई शांताराम तुकाराम बोरसे (50) व खाजगी इसम सुरेश सोनू ठेंगे (40) अशी अटकेतील आरोपींची नावे आहेत.
असे आहे नेमके प्रकरण
70 वर्षीय तक्रारदार यांची मौजे बहाळ रथाचे, ता.चाळीसगाव येथे गट क्रमांक 57/2 क्षेत्र 1हेक्टर 64 आर अशी शेत जमीन आहे. या शेतजमिनीवर ग्रामपंचायत बहाळ हे त्यांचा हक्क दाखवून सदरची जागा परस्पर इतर व्यक्तीस भाडेतत्त्वावर देण्याची शक्यता असल्याने तक्रारदार यांनी ग्रामपंचायतीविरुद्ध न्यायालयातून कायमस्वरूपी मनाई हुकूम आणला. त्यानंतर सरपंच राजेंद्र मोरे यांनी तक्रारदार यांना भेटून त्यांच्या शेतजमिनीबाबत ग्रामपंचायतीकडून कोर्ट कचेर्‍यांचा त्रास न होऊ देण्याच्या मोबदल्यात दीड हजार चौरस फुटाचा प्लॉट खरेदी करून द्यावा लागेल, असे सांगितले. त्यास तक्रारदाराने नकार दिल्याने सरपंच मोरे यांनी दहा लाख रुपये लाच 29 नोव्हेंबर रोजी मागितली व त्यात पाच लाखांवर तडजोड होवून एसीबीकडे तक्रार नोंदवण्यात आली. लाचेतील पहिला हप्ता म्हणून दोन लाख रुपये देण्याचे गुरुवार, 26 रोजी निश्चित केल्यानंतर सापळा रचण्यात आला.
पंटराने लाच स्वीकारताच तिघे जाळ्यात
गुरुवारी दुपारी लाच रकमेतील दोन लाख रुपये खाजगी पंटर सुरेश टेंगे याने आरोपी सरपंच मोरे यांच्या घरात बहाळ रथाचे येथे स्वीकारताच सुरूवातीला त्याला व नंतर सरपंच राजेंद्र मोरे व शिपाई शांताराम बोरसे यांना अटक करण्यात आली.
यांनी केला सापळा यशस्वी
धुळे एसीबीचे पोलीस उपअधीक्षक सचिन साळुंखे यांच्या नेतृत्वात पोलीस निरीक्षक पंकज शिंदे, हवालदार राजन कदम, हवालदार पावरा, सुधीर मोरे, रामदास बारेला, प्रवीण पाटील आदींच्या पथकाने हा सापळा यशस्वी केला.
