धुळ्यातील ओयो हॉटेलमध्ये महाविद्यालयीन युवक-युवती आढळले : कारवाईने उडाली खळबळ
धुळे (2 जानेवारी 2025) : महाविद्यालयीन युवक-युवतींना शहरातील ओयो हॉटेलमध्ये रूम उपलब्ध करून दिल्या जात असल्याच्या तक्रारी स्थानिकांनी केल्यानंतर आझादनगर पोलिसांनी गुरुवारी छापेमारी करीत तरुण-तरुणींना ताब्यात घेतले. या प्रकारानंतर शहरात मोठी खळबळ उडाली. हॉटेल मालकाची पोलिसांकडून चौकशी सुरू करण्यात आली आहे तर युवतींच्य पालकांना बोलावून त्यांना समज देत तरुणींचा ताबा देण्यात आला.
पोलिस प्रशासन अधिक सतर्क
गेल्या काही दिवसांपूर्वी अशाच पद्धतीने एका अल्पवयीन मुलीला ओयो हॉटेलमध्ये नेऊन तिच्यावर शारीरिक अत्याचार करून एका तरुणाने बदनामी केल्याची धक्कादायक घटना समोर आली होती. या घटनेनंतर पोलिस प्रशासन अधिक सतर्क झाले आहे.
नागरिकांची तक्रार येताच कारवाई
शहरातील हॉटेल युनिक इन ओयोमध्ये गुरुवारी पोलिसांनी अचानक धाड टाकली. या धाडीत हॉटेलमधून पोलिसांनी महाविद्यालयीन तरुण व तरुणींना ताब्यात घेतल्यामुळे धुळे शहरात एकच खळबळ उडाली आहे. गेल्या अनेक दिवसांपासून धुळे शहरातील हॉटेल युनिक इनमध्ये महाविद्यालयीन तरुण-तरुणी अनधिकृतपणे येत असल्याची माहिती परिसरातील नागरिकांनी पोलिसांना दिल्यानंतर धाड टाकण्यात आली.
