निकष डावलून लाडक्या बहिण योजनेचा लाभ : धुळ्यातील महिलेच्या खात्यावरील रक्कम सरकारी तिजोरीत !
धुळे (4 जानेवारी 2025) : निकष डावलून लाभ घेतलेल्या लाडक्या बहिणींच्या खात्यातून रक्कम जमा करण्यात येत असल्याची माहिती समोर आली आहे. धुळे जिल्ह्यात एका महिलेला मिळालेले 7500 रुपये सरकारच्या तिजोरीमध्ये पुन्हा जमा करण्यात आल्याची माहिती आहे.
अपात्र महिलांच्या खात्यातून पैसे जमा होण्यास सुरुवात
लाडकी बहीण योजना सुरू झाली, तेव्हा त्या योजनेचा लाभ घेण्यासाठी विविध निकष निश्चित करण्यात आले होते. पण विधानसभा निवडणूक जवळ आल्याने सरसकट सर्व अर्ज स्वीकारण्यात आले.आता मुख्यमंत्री देवेंद्र फडणवीसांनी या योजनेचा आढावा घेतल्यावर अर्जांची पडताळणी करण्यात येईल, अशी घोषणा महिला व बालविकासमंत्री आदिती तटकरे यांनी केली होती. त्यानुसार ही पडताळणी सुरू झाली आहे. पडताळणीनंतर अपात्रमहिलांच्या खात्यातील पैसे काढून घेण्यास सुरुवात झाली आहे.
महिलांच्या अर्जांची पडताळणी होणार
लाडकी बहीण योजनेचा हप्ता घेतलेल्या धुळे जिल्ह्यातील नकाणे गावातील महिलेच्या खात्यातून 7500 रुपये पुन्हा परत घेण्यात आले आहे. महिला पात्र नसतानाही तिने अर्ज केला होता. या महिलेने अन्य एका योजनेचा लाभ घेतला होता. त्यामुळे या महिलेला पैसे पुन्हा देण्यास सांगण्यात आले आहे. त्यानुसार सरकारी तिजोरीत 7500 रुपये जमा झाले आहे. जळगावसह धुळे, गडचिरोली, वर्धा, पालघर या जिल्ह्यातून अपात्र महिलांनी अर्ज केल्याच्या तक्रारी आल्या होत्या. तक्रारींमुळे केसरी आणि पिवळे शिधापत्रक वगळता सर्व अर्जांची छाननी होणार आहे.
