तळोदा (14 जानेवारी 2025) : बुधावल प्राथमिक आरोग्य केंद्रात परिचारिका असलेल्या 32 वर्षीय विवाहितेचा खून झाल्याची घटना सोमवार, 13 रोजी समोर आली होती. तळोदा पोलिसांनी तपासचक्रे फिरवत या खुनामागे पतीच असल्याचे उघडकीस आणले आहे. पैसे मागितल्याच्या वादातून पतीने ही हत्या केल्याची माहिती सूत्रंनी दिली.
काय घडले नेमके ?
तळोदा तालुक्यातील नळगव्हाण शिवारात नदीकिनारी सोमवार, 13 जानेवारी रोजी सकाळी 10 वाजेदरम्यान वंदना राकेश वळवी (32, नळगव्हाण) यांचा मृतदेह आढळला होता. पोलिसांनी तातडीने तपास करून काही तासांतच या खुनाचा उलगडा करीत पती राकेश वळवी यास बेड्या ठोकल्या.
विवाहिता गायब झाल्याच रचला बनाव
वंदना वळवी परिचारीका कार्यरत होत्या. रविवार, 12 जानेवारी रोजी वंदनाने आपल्या मुलाला आईकडे सोडून त्या पती राकेशसोबत शेतात गेल्या मात्र पती राकेश सतत वंदनाकडून पैशांची मागणी करीत असल्याने पैसे देण्यास वंदनाने नकार दिल्याने संतापलेल्या राकेशने कुदळीने पत्नीच्या डोक्यावर वार करून तिची हत्या केली. खुनानंतर तिचा मृतदेह नदीकिनारी फेकून वंदना अचानक गायब झाल्याचा बनाव त्याने रचला.
घटनेची माहिती मिळताच तळोदा पोलीस ठाण्याचे अधिकारी घटनास्थळी दाखल झाले. श्वानपथक आणि ठसे तज्ज्ञांच्या मदतीने तपास करण्यात आला. वंदनाच्या मृतदेहाच्या तपासादरम्यान पोलिसांना तिच्या पतीवर संशय आला. चौकशीत राकेशने खुनाची कबुली दिली.
या प्रकरणी वंदनाच्या भावाने तळोदा पोलीस ठाण्यात तक्रार दाखल केली असून, राकेश वळवीविरोधात खुनाचा गुन्हा नोंदविण्यात आला. तपास पोलीस उपनिरीक्षक धर्मेंद्र पवार यांच्या मार्गदर्शनाखाली सुरू आहे.
