विसरवाडीत पुतण्यानेच केला काकांचा खून : धुळे गुन्हे शाखेकडून 48 तासात गुन्ह्याची उकल
गॅरेज चालक पुतण्यासह दोघांना पडल्या बेड्या ः मद्यपी काकांच्या त्रासाला वैतागून खून
Nephew murdered uncle in Viswarwadi : Dhule Crime Branch solves crime within 48 hours धुळे (14 जानेवारी 2025) : मद्य प्राशन करून सातत्याने त्रास देत असलेल्या काकाचा नात्याने पुतण्या असलेल्या आरोपीने मित्राच्या मदतीने खून केल्याचा प्रकार धुळे स्थानिक गुन्हे शाखेने 48 तासात उघडकीस आणला आहे. या प्रकरणी गुन्ह्यातील कारसह दोघा आरोपींना अटक करण्यात आली. सईद शहा चिराग शहा फकीर (28, संतोषी माता गल्ली, विसरवाडी, जि.नंदुरबार) असे खून झालेल्या तरुणाचे तर अवेश सलीम शहा (24, इंदिरा नगर, विसरवाडी) व सोहेल उर्फ बबलू मुबारक शहा (20, संतोषी माता गल्ली, विसरवाडी) अशीे अटकेतील आरोपींची नावे आहेत.
खून करून मृतदेह फेकला
साक्री तालुक्यातील कोंडाईबारी घाटात दोन दिवसांपूर्वी खून करून मृतदेह फेकण्यात आल्याचा प्रकार समोर आला होता. धुळे गुन्हे शाखेने आधी अनोळखी असलेल्या मयताची ओळख पटवत मयत हा सईद शहा चिराग शहा फकीर (28, संतोषी माता गल्ली, विसरवाडी, जि.नंदुरबार) असल्याचे निष्पन्न केले होते. मयत सईद शहा यास दारूचे व्यसन होते व त्यातून तो नातेवाईकांशी वाद घालत असल्याची माहिती धुळे गुन्हे शाखेचे वरिष्ठ निरीक्षक श्रीराम पवार यांना कळाल्यानंतर त्यांनी वेगात तपासचक्रे फिरवत दोघा आरोपींना अटक केली.
काळ्या रुमालावरून पटली ओळख
मयत सईद शहा हा मंगळवार, 7 जानेवारी रोजी दुपारी पुतण्या अवेश सलीम शहाच्या गॅरेजवर आल्यानंतर अवेशने मित्र सोहेल शहाला सोबत घेत स्वीप्ट (जी.जे.15 ए.डी.1533) मध्ये काका सईद शहाला बसवत साक्री तालुक्यातील कोंडाईबारी घाटात नेले व तेथे काकाच्या तोंडावर काळा रूमाल बांधून त्याचा श्वास बंद केला व हात-पाय दोराने बांधून 40 फूट खोल दरीत फेकून घरी पळ काढला. आरोपी अवेश सलीम शहाला काळा रूमाल वापरण्याची सवय असल्याने त्यातून पोलिसांना धागा गवसला व दोघांना बेड्या पडल्या. पोलिसांनी गुन्ह्यातील कार जप्त केली आहे.
यांनी उघडकीस आणला गुन्हा
धुळे पोलीस अधीक्षक श्रीकांत धीवरे, अपर पोलीस अधीक्षक किशोर काळे यांच्या मार्गदर्शनाखाली धुळे गुन्हे शाखेचे वरिष्ठ निरीक्षक श्रीराम पवार, पोलीस उपनिरीक्षक अमित माळी, साक्री ठाण्याचे सहाय्यक निरीक्षक जयेश खलाणे, सहा.निरीक्षक अनिल बागुल, स्थानिक गुन्हे शाखेचे संजय पाटील, हवालदार संतोष हिरे, सदेसिंग चव्हाण, तुषार सूर्यवंशी, योगेश जगताप, सुनील पाटील, चालक संजय सुरसे, चालक कैलास महाजन, चालक राजीव गीते, साक्री पोलीस ठाण्याचे रामलाल अहिरे, संजय शिरसाठ, शांतीलाल पाटील, आनंद चव्हाण, तुषार जाधव, प्रमोद जाधव आदींच्या पथकाने या गुन्ह्याची उकल केली.
