नंदुरबारच्या शिक्षकाचे सेक्सटॉर्शन : खंडणी उकळण्याच्या प्रयत्नातील धुळ्यातील रॅकेट गुन्हे शाखेच्या जाळ्यात
नंदुरबारच्या शिक्षकाचा बनवला अश्लील व्हिडिओ : नंदुरबारमधून आवळल्या आरोपींच्या मुसक्या
धुळे (14 जानेवारी 2025) : नंदुरबार येथील शिक्षकाशी आधी फेसबुकवर मैत्री करीत त्यास धुळ्यात बोलावून तरुणीने अंगावरील अश्लील कपडे काढले व नंतर त्रिकूटाने छापेमारी करीत अश्लील व्हिडिओ व्हायरलची धमकी देत 12 लाखांची खंडणी मागितल्याची घटना धुळे शहरात घडली होती. पीडीत शिक्षकाने धुळे गुन्हे शाखेकडे तक्रार नोंदवल्यानंतर सापळा रचून धुळ्यातील चौकडीला नंदुरबार शहरात बेड्या ठोकण्यात आल्या आहेत. आरोपींच्या अटकेनंतर चौकडीने यापूर्वी काहींना ब्लॅकमेल करून खंडणी उकळल्याचे प्रकार समोर येण्याची शक्यता पोलीस सूत्रांनी वर्तवली.
काय घडले नेमके ?
धुळ्यातील एका भागातील तरुणीने फेसबुकद्वारे नंदुरबारच्या शिक्षकाशी मैत्री केली व नंतर मैत्री खोलवर रूजताच तरुणीने धुळे भेटीचे निमंत्रण दिल्यानंतर शिक्षक 12 रोजी धुळ्यात आले. तरुणीच्या घरी शिक्षक गेल्यानंतर तरुणी निर्वस्त्र झाली व त्याचवेळी तिघांनी तिथे छापा टाकत शिक्षकाला निर्वस्त्र करीत व्हिडिओ बनवला. शिक्षकाला शिविगाळ करीत 12 लाखांची खंडणी मागण्यात आली व मोबाईल हिसकावून घेण्यात आला.
नंदुरबारमध्ये सापळा रचून चौघांना पकडले
शिक्षकाने गुन्हे शाखेचे वरिष्ठ निरीक्षक श्रीराम पवार यांची भेट घेत कैफियत मांडल्यानंतर सोमवार, 13 रोजी नंदुरबार येथे धुळे चौफुलीवर सापळा रचण्यात आला. संशयीत चौघे कारमध्ये आल्यानंतर तक्रारदार शिक्षक कारमध्ये बसताच पोलिसांनी छापेमारी करीत कारमधील चौघांना अलगद बेड्या ठोकल्या. देवेश दीपक कपूर (19,) हितेश ज्ञानेश्वर बिर्हाडे (19, दोन्ही रा.तिरुपती नगर, बिलाडी रोड, देवपूर, धुळे), हर्षल गोपाल वाघ (21, भगवा चौक, रावेर, जि.धुळे), विनय देवानंद नेरकर (23, फॉरेस्ट कॉलनी, देवपूर धुळे) यांना अटक करण्यात आली. दरम्यान वरील चार आरोपींसह जीपीटी स्टॉप, धुळे येथे राहणार्या तरुणीविरोधात देवपूर पोलीस ठाण्यात गुन्हा दाखल करण्यात आला.
यांनी उघडकीस आणला गुन्हा
धुळे पोलीस अधीक्षक श्रीकांत धीवरे, अपर पोलीस अधीक्षक किशोर काळे यांच्या मार्गदर्शनाखाली धुळे गुन्हे शाखेचे वरिष्ठ निरीक्षक श्रीराम पवार, पोलीस उपनिरीक्षक प्रकाश पाटील, हवालदार मायूस सोनवणे, हवालदार संदीप पाटील, हवालदार पंकज खैरमोडे, हवालदार चेतन बोरसे, चालक संजय सुरसे आदींच्या पथकाने ही कारवाई केली.
