धुळे गुन्हे शाखेची मोठी कारवाई : शिंदखेडा तालुक्यातील देान बियर बार फोडणार्या पाडसेतील आरोपींना बेड्या
55 हजारांचा मद्यसाठा जप्त : गुन्हे शाखेकडून दोन गुन्ह्यांची उकल
धुळे (21 जानेवारी 2025) : शिंदखेडा तालुक्यातील पाटण येथील बियर बारमधून चोरट्यांनी मद्यसाठा लांबवला होता. धुळे गुन्हे शाखेने या प्रकरणी पाडसे, ता.अमळनेर येथील दोन आरोपींना अटक केली असून त्यांच्याकडून सुमारे 55 हजारांचा मद्यसाठा जप्त करण्यात आला. आरोपींनी शिंदखेडा पोलीस ठाणे हद्दीत दोन ठिकाणी चोर्या केल्याची कबुली दिली.
गोपनीय माहितीवरून कारवाई
पाटण, ता.शिंदखेडा येथील हॉटेल कन्हैय्या गार्डनमधून 3 जानेवारी रोजी 37 हजार 580 रुपयांचा मद्यसाठा तसेच एक हजार शंभर रुपयांची रोकड चोरीला गेली होती तसेच मुंबई-आग्रा महामार्गावरील बाभळे फाटा भागातील हॉटेल हिरा येथूनही मद्यसाठा लांबवण्यात आला होता. या चोरीबाबत धुळे गुन्हे शाखेचे वरिष्ठ निरीक्षक श्रीराम पवार यांना माहिती मिळाल्यानंतर त्यांनी गुन्हे शाखेला निर्देश दिल्यानंतर करण उर्फ लालू संतोष पारधी (20) व निलेश पांडुरंग पाटील (24, दोन्ही रा.पाडसे, ता.अमळनेर) यांना अटक करण्यात आली तर आरोपींचा साथीदार शांताराम उर्फ शान्या प्रताप कोळी (पाडसे, ता.अमळनेर) हा पसार झाला आहे. आरोपींकडून 55 हजार 575 रुपये किंमतीचा मद्यसाठा जप्त करण्यात आला.
यांनी केली कारवाई
ही कारवाई धुळे पोलीस अधीक्षक श्रीकांत धीवरे, अपर पोलीस अधीक्षक किशोर काळे यांच्या मार्गदर्शनाखाली धुळे गुन्हे शाखेचे वरिष्ठ निरीक्षक श्रीराम पवार, संजय पाटील, चेतन बोरसे, दिनेश परदेशी, सचिन गोमसाळे, प्रशांत चौधरी, हर्षल चौधरी, विनायक खैरनार, कमलेश सूर्यवंशी, राहुल गिरी, जगदीश सूर्यवंशी आदींच्या पथकाने केली.
