धुळ्यातील कॅफेआड अश्लील चाळे : 22 तरुण-तरुणींना पकडले
कारवाईने कॅफे चालकांमध्ये खळबळ : कॅफेत आढळले लाकडी कॉट
धुळे (30 जानेवारी 2025) : शहरातील देवपूर परिसरातील विविध महाविद्यालयांच्या परिसरात सुरू असलेल्या कॅफेंमध्ये तरुण-तरुणींना अश्लील चाळे करण्यासाठी मुभा दिली जात असल्याची तक्रार धुळ्याचे पोलीस अधीक्षक श्रीकांत धीवरे यांच्याकडे आल्यानंतर त्यांनी गुरुवार, 30 रोजी स्वतः उपस्थित राहत धडक कारवाई केली. एकूण पाच पथकांद्वारे दहा कॅफेंची तपासणी केल्यानंतर डी.लाईट कॅफे, शाईनिंग कॅफे, रॉयल लॉज, विथ यु कॅफे, शुगर कॅफेत तब्बल 22 तरुण-तरुणी अश्लील चाळे करताना आढळल्याने त्यांना ताब्यात घेण्यात आले तसेच विद्यार्थ्यांसह कॅफे चालक व मालकांना देवपूर पोलीस ठाण्यात आणण्यात आल्यानंतर विद्यार्थ्यांच्या पालकांना बोलावून घडला प्रकार कळवण्यात आला. कॅफे मालकांविरोधात आता गुन्हा दाखल केला जाणार असल्याचे पोलीस सूत्रांनी सांगितले.
यांचा कारवाईत सहभाग
या कारवाईत धुळ्याचे पोलीस अधीक्षक श्रीकांत धीवरे, अपर पोलीस अधीक्षक किशोर काळे, उपविभागीय पोलीस अधिकारी राजकुमार उपासे, देवपूर पोलीस ठाण्याचे निरीक्षक धनंजय पाटील, स्थानिक गुन्हे अन्वेषण शाखेचे वरिष्ठ निरीक्षक श्रीराम पवार यांच्यासह जिविशा शाखेच्या निकीता महाले, महापालिकेच्या आयुक्त अनिता दगडे पाटील तसेच आमदार अनुप अग्रवाल यांच्यासह पोलीस पथकाचा सहभाग होता.
