जळगाव (2 फेब्रुवारी 2025) : कामानिमित्त जळगावात आलेल्या धुळ्यातील व्यापार्‍याला मारहाण करीत अपहरण करून लूटण्यात आले होते. याप्रकरणी जळगाव शहर पोलिसांनी त्रिकूटाला बेड्या ठोकल्या आहेत. ही घटना शनिवार, 1 फेब्रुवारी रोजी दुपारी 3.30 वाजता घडली होती.
काय आहे नेमके प्रकरण
शाहिद मुन्ना कुरेशी (34, रा.उत्तर प्रदेश, ह.मु. धुळे) हे व्यापारी असून कर्नाटक एक्सप्रेसमधून जळगावला उतरले. जळगाव रेल्वे स्थानकाजवळील पान टपरीवर पान घेत असताना दुचाकीवर तीन जण त्यांच्याजवळ आले. तू गायी कापायचा व्यवसाय करतो, असा आरोप लावून तिघांनी शाहिद कुरेशी याला मारहाण करून दुचाकीवर बळजबरी बसविले. भुसावळ रोडवरील गोदावरी इंजिनिअरिंग कॉलेजजवळ घेऊन गेले. त्या ठिकाणी सुरुवातीला 20 हजारांची मागणी केली, इतके पैसे नसल्याने संशयित आरोपींनी ऑनलाईन पद्धतीने 2 हजार रुपये घेतले आणि खिशातील 300 रुपये जबरी काढून घेतले, अशी एकूण 2 हजार 300 घेऊन दमदाटी करून सोडून दिले.
शहर पोलिसात तक्रार
ही घटना घडल्यानंतर व्यापार्‍याने जळगाव शहर पोलीस ठाण्यात धाव घेऊन तक्रार दिल्यानंतर गुन्हा दाखल करण्यात आला. गुन्हा दाखल होताच पोलीस निरीक्षक अनिल भवारी यांच्यासह पथकाने तपासाची चक्रे फिरविली. सीसीटीव्ही कॅमेर्‍याच्या आधारे संशयित आरोपी यश रवींद्र पाटील (21, रा. आव्हाने, ता.जळगाव), मनोज आधार सोनवणे (23, रा.कांचन नगर, जळगाव) आणि महेंद्र पांडुरंग पाटील (28 रा.वाटिका आश्रम, जळगाव) या तीन जणांना अटक करण्यात आली. तपास सहाय्यक पोलीस निरीक्षक रामचंद्र शिखरे हे करीत आहे.
यांनी केली कारवाई
ही कारवाई पोलीस निरीक्षक अनिल भवारी यांच्या मार्गदर्शनाखाली सहाय्यक पोलीस निरीक्षक रामचंद्र शिकारे, सहाय्यक फौजदार सुनील पाटील, हवालदार संतोष खवले, उमेश भांडारकर, सतिष पाटील, भास्कर ठाकरे, योगेश पाटील, किशोर निकुंभ,पोलीस नाईक चंदू सोनवणे, अमोल ठाकूर, पांचाळ, प्रणय पवार यांच्या पथकाने केली.
