थाळनेर हादरले : पत्नीने दारूला पैसे न दिल्याने हैवान पतीने दोघा गोंडस चिमुकल्यांना नदीत फेकले
थाळनेर (6 फेब्रुवारी 2025) : दारूच्या आहारी गेलेल्या पतीला दारूसाठी पत्नीने पैसे न दिल्याने आरोपीने आपल्या दोन्ही चिमुकल्यांना नदीपात्रात फेकल्याने त्यांचा मृत्यू झाला. ही घटना थाळनेर येथे घडली. चिमुकल्यांचा मृतदेह पाहताच मातेने टाहो फोडला. कार्तिक (6) चेतना उर्फ चिमू (3) अशी दोघा मृतांची नावे असून बुधवारी शवविच्छेदनानंतर मृतदेह कुटुंबीयांच्या स्वाधीन केल्यानंतर स्मशानभूमीत दोघा भावंडाचा दफनविधी करण्यात आला. सुनील नारायण माळी या नराधम पित्याविरोधात खुनाचा गुन्हा दाखल करण्यात आला व न्यायालयाने त्याला दोन दिवसांची पोलिस कोठडी सुनावली.
काय घडले नेमके
आरोपी पतीने पत्नीकडे दारूसाठी पैसे मागितले मात्र न ते दिल्यानंतर संतप्त पती आपल्या दोन्ही मुलांना आजोळी सोडतो म्हणून घेवून गेला मात्र सायंकाळी पत्नीला संशय आल्यानंतर तिने विचारणा केली असता त्याने वडिलांकडे मुले खेळत असल्याचे सांगितले. यावेळी महिलेने खातरजमा केली असता मुले आजोळी पोहोचली नसल्याचे स्पष्ट होताच खातरजमा केल्यानंतर पतीने तापी पात्रात त्यांना फेकल्याची कबुली दिली. तापीतून मुलांचे मॄतदेह पाहिल्यानंतर आईने हंबरडा फोडला. या घटनेमुळे इतर महिलांच्या डोळ्यात पाणी तर गावकर्यांनी सुनीलबद्दल संताप व्यक्त करून त्याला कडक शिक्षेची मागणी केली.
