मोहाडी पोलिसांची दमदार कामगिरी : आर्वीतील शेतकर्याचे 13 लाख लुटणार्या दोघा आरोपींना बेड्या
सात लाख 48 हजारांची रोकड जप्त : प्रवासात मोठ्या प्रमाणावर रोकड न नेण्याचे यंत्रणेचे आवाहन
धुळे (13 फेब्रुवारी 2025) : कापूस विक्री करून घराकडे परतणार्या शेतकर्यांना धुळ्याजवळील लळींग घाटात अडवत विना क्रमांकाच्या दुचाकीवरून आलेल्या तिघांनी मारहाण करीत त्यांच्याकडील 13 लाख 15 हजार 200 रुपये लूटले होते. मोहाडी पोलिसात दाखल गुन्ह्यानंतर दोन आरोपींना अटक करण्यात यंत्रणेला यश आले आहे. दोन आरोपींच्या ताब्यातून सात लाख 48 हजार 185 रुपये जप्त करण्यात आले असून उर्वरित दोन आरोपींचा शोध सुरू असल्याची माहिती धुळे पोलीस अधीक्षक श्रीकांत धीवरे यांनी दिली.
संधी साधत लांबवली रोकड
दिलीप महादु गर्दे (आवीं, ता.धुळे) व त्यांचे सहकारी संतोष मोतीराम मासुळे (सडगाव, जि.धुळे) हे त्यांच्याकडील कापूस विक्री करून 13 लाख 15 हजार 200 रुपये घेवून दुचाकीने धुळ्याहून आर्वी जात असताना 9 जानेवारी 2025 रोजी दुपारी साडेतीन वाजता लळींग टोलनाक्याच्या पुढे रानमळा फाट्याजवळ एका विना क्रमांकाच्या युनिकॉर्न मोटार सायकलवर मास्क बांधून आलेल्या तिघांनी रस्ता अडवत साक्षीदार संतोष मासुळे यांच्या उजव्या हातावर धारदार शस्त्राने वार करीत 13 लाख 15 हजार 200 रुपये ठेवलेली बॅग लांबवली होती. याप्रकरणी मोहाडी पोलिसात गुन्हा दाखल करण्यात आला होता.
चौघे आरोपी निष्पन्न
गुन्हा दाखल होताच पोलिसांनी रितीक उर्फ निक्की अमरिकसिंग पंजाबी (22, कोळवले नगर, धुळे), खुशाल उर्फ मनोज अशोक मोकळ (म्हाडा वसाहत, मोहाडी उपनगर, धुळे), बंटी शांताराम अहिरे (मोहाडी उपनगर, धुळे), रवींद्र राजेंद्र वाघ (मोहाडी उपनगर, धुळे) निष्पन्न केले व रितीक उर्फ निक्की अमरिकसिंग पंजाबी (22, रा.कोळवले नगर, धुळे) यास 13 जानेवारी रोजी अटक करण्यात आली. अन्य आरोपी पसार झाल्याने त्यांचा सुरत, गुजरात तसेच पारवाडी, ता.बारामती, जि. पुणे, अंगापुर वंदन, ता.जि. सातारा येथे शोध घेण्यात आला मात्र दरवेळी ते गुंगारा देण्यात यशस्वी होत होते.
धुळ्यात ठोकल्या बेड्या
गुन्ह्यातील पसार आरोपी नामे बंटी शांताराम आहिरे व रवींद्र राजेंद्र वाघ हे धुळ्यात येणार असल्याची माहिती मोहाडी निरीक्षक शशिकांत पाटील यांना कळाल्यानंतर पोलीस उपनिरीक्षक संदीप काळे व शोध पथकातील अंमलदार यांनी सावळदे शिवारात रेल्वे लाईनच्याजवळ सापळा रचुन त्यांना ताब्यात घेतले. आरोपींकडून सात लाख 48 हजार 185 रुपयांची रोकड जप्त करण्यात आली. तपास पोलीस उपनिरीक्षक संदीप काळे करीत आहेत.
यांनी केली कारवाई
ही कारवाई जळगाव पोलीस अधीक्षक श्रीकांत धीवरे, अपर पोलीस अधीक्षक किशोर काळे, उपविभागीय पोलीस अधिकारी राजकुमार उपासे यांच्या मार्गदर्शनाखाली मोहाडी पोलीस निरीक्षक शशिकांत पाटील, पोलीस उपनिरीक्षक संदीप काळे, पोलीस उपनिरीक्षक चेतन मुंढे, पर्यवेक्षाधीन पोलीस उपनिरीक्षक नितीन करंडे, हवालदार संदीप कदम, हवालदार किरण कोठावदे, हवालदार सचिन वाघ, हवालदार पंकज चव्हाण, कॉन्स्टेबल मनीष सोनगिरे, कॉन्स्टेबल मुकेश मोरे, कॉन्स्टेबल प्रकाश जाधव, कॉन्स्टेबल बापुजी पाटील, चालक हवालदार शशिकांत वारके आदींच्या पथकाने केली.
