नंदुरबार-धुळे बसमध्ये चार लाखांची रोकड चोरताना चिकलठाण्यातील महिलांना रंगेहाथ पकडले
प्रवाशाच्या सतर्कतेने महिलांना पडल्या बेड्या : जिल्हा पोलीस अधीक्षकांकडून प्रवाशाचा गौरव
धुळे (14 फेब्रुवारी 2025) : नंदुरबार-धुळे प्रवासादरम्यान गर्दीचा फायदा घेत भामट्या महिलांनी प्रवाशाच्या बॅगेतील चार लाखांची रोकड चोरली व हा प्रकार एका सतर्क प्रवाशाने पाहताच आरडा-ओरड करीत बस थेट धुळ्यातील देवपूर पोलीस ठाण्यात आणली. याप्रकरणी संशयीत पद्मा राहुल शेट्टी (20) व अक्षया राजन शेट्टी (20, चिखलठाणा, औरंगाबाद) यांना बेड्या ठोकण्यात आल्या असून त्यांच्या ताब्यातून चार लाख नऊ हजार पाचशे रुपयांची रोकड जप्त करण्यात आली. दरम्यान, प्रवासात सतर्कता व धाडस दाखवणार्या मोहित समाधान पाटील (धुळे) या तरुणाचा धुळ्याचे पोलीस अधीक्षक श्रीकांत धीवरे यांनी सत्कार केला.
गर्दीचा फायदा घेत लांबवली रोकड
शिवाजी राजाराम पाटील (70, दाऊळ मंदाणे, ता.शिंदखेडा) हे शुक्रवार, 14 रोजी नंदुरबार-धुळे बस (एम.एच.14 बी.टी.1864) द्वारे दोंडाईचा-धुळे प्रवास करीत असताना सोनगीर येथून दोन महिला बसमध्ये बसल्या. यावेळी चोरट्या महिलेच्या साथीदाराने पाटील यांच्या बॅगेतून चार लाख नऊ हजार पाचशे रुपयांची रोकड काढत दुसर्या साथीदाराकडे बॅगेत ठेवण्यासाठी दिली व हा प्रकार प्रवासी मोहित पाटील याने पाहताच आरडा-ओरड करीत बस देवपूर पोलीस ठाण्यात आणली. यानंतर या महिलांना पोलिसांनी ताब्यात घेत त्यांच्याकडून रोकड जप्त करण्यात आली व गुन्हा दाखल करण्यात आला.
यांनी केली कारवाई
ही कारवाई धुळे पोलीस अधीक्षक श्रीकांत धीवरे, अपर पोलीस अधीक्षक किशोर काळे, पोलीस उपअधीक्षक सचिन उपासे, पोलीस निरीक्षक धनंजय पाटील यांच्या मार्गदर्शनाखाली गणेश आघाव, मिलिंद सोनवणे, प्रवीण पाटील, भटेंद्र पाटील, राहुल गुंजाळ, वसंत कोकणी, सौरभ कुटे, नितीन चव्हाण, महिला हवालदार शिरसाठ, कॉन्स्टेबल धोबी यांच्या पथकाने केली.
