धुळे गुन्हे शाखेची कामगिरी : मालेगावकडून नवापूरकडे निघालेला एक लाख 33 हजारांचा अवैध मद्यसाठा जप्त
दोन आरोपींना अटक : मोहाडी पोलिसात संशयीतांविरोधात गुन्हा दाखल
Dhule Crime Branch’s performance : Illegal liquor worth Rs 1.33 lakh seized from Malegaon to Navapur धुळे (18 मार्च 2025) मालेगावहून नवापूरकडे चारचाकी वाहनात अवैधरित्या मद्याची तस्करी होणार असल्याची माहिती धुळे गुन्हे शाखेला मिळाल्यानंतर पथकाने कारवाई करीत पाच लाख रुपयांची कार व एक लाख 33 हजारांचा मद्यसाठा जप्त केला. याप्रकरणी कार चालकासह दोघांना अटक करण्यात आली असून त्यांच्याविरोधात मोहाडी पोलिसात गुन्हा दाखल करण्यात आला.
गोपनीय माहितीवरून कारवाई
धुळे गुन्हे शाखेचे वरिष्ठ पोलीस निरीक्षक श्रीराम पवार यांना मालेगावकडून नवापूरकरडे अवैधरित्या कारद्वारे मद्याची वाहतूक होणार असल्याची माहिती मिळाल्यानंतर त्यांनी पथकाला निर्देश दिले. मोहाडी हद्दीतील धुळे रस्त्यावर एका पत्री शेडजवळ कार (डी.एन.09 जे.2594) अडवल्यानंतर तिची तपासणी केली असता त्यात एक लाख 33 हजार 125 रुपये किंमतीचा अवैधरित्या मद्य साठा आढळल्याने तो जप्त करण्यात आला. चालक भाविनकुमार मगनभाई पटेल (31, मोटी वाकड, दमन) व प्रतीक धिरूभाई पटेल (30, वचला फलिया, सोनवाडा, ता.पारडी, गुजरात) यांना अटक करण्यात आली.
यांनी केली कारवाई
ही कारवाई धुळे पोलीस अधीक्षक श्रीकांत धीवरे, अपर पोलीस अधीक्षक किशोर काळे, धुळे गुन्हे शाखेचे वरिष्ठ निरीक्षक श्रीराम पवार, पोलीस उपनिरीक्षक अमरजीत मोरे, संजय पाटील, श्याम निकम, हवालदार सदेसिंग चव्हाण, हवालदार संतोष हिरे, हवालदार प्रशांत चौधरी, कॉन्स्टेबल सुनील पाटील, महेंद्र सपकाळ, कॉन्स्टेबल अतुल निकम आदींच्या पथकाने केली.
